Мааны айылҕалаах Түбэ нэһилиэгэр олус интэриэһинэй тэрээһин ыытылынна. Ол курдук, бэс ыйын 16-17 күннэригэр Түбэ нэһилиэгин баһылыга Григорий Гуляев көҕүлээһининэн нэһилиэккэ Балыксыт сылын чэрчитинэн «Дьиэ кэргэнинэн илиминэн уонна күөгүнэн балыктааһын» күрэх үрдүк таһымҥа ыытылынна.

Икки күннээх тыҥааһыннаах күрэхтэһии түмүгэ маннык буолла:
1 м. – Диана уонна Роберт Ефимовтар 5 оҕолорунаан, «Рыболов» маҕаһыыҥҥа 20 тыһ. солк. сертификат, спонсор – Лена уонна Савва Ильиннэр уонна кинилэр халыҥ аймахтара;
2 м. – Розалия уонна Вячеслав Григорьевтар, икки миэстэлээх эрэһиинэ тыы, спонсор – СР балыктааһын спордун Федерацията уонна «Егерь» маҕаһыын;
3 м. – Татьяна уонна Альберт Никоновтар Саян диэн уолларынаан, күүстээх күүрүүлээх массыына сууйар тэрил, спонсор – олохтоох дьаһалта;
4 м. – Елизавета уонна Алексей Сивцевтэр, микроволновай оһох, спонсор «Белое озеро» Пестряковтар этнокомплекстара.

Ону таһынан бары дьиэ кэргэттэргэ «А-групп» ХЭТ Түбэ анныгар балык көҥүлүгэр сертификаттары туттарда.

Ефимовтар халыҥ дьиэ кэргэттэрэ «Семья рыбаков» анал аат хаһаайыннарынан буоллулар уонна оту охсор тэрилинэн наҕараадаланнылар. Бирииһи олохтоох дьаһалта туруорда.

Роберт Ефимов «Большая рыба» анал аатын ылан, Намнааҕы бизнес-киин (директора Борис Бугаев) туруорбут спиннинг наборунан наҕараадаланна.