Нам улууһуттан 17 киһилээх команданы Литвинова Марина Дмитриевна салайан илдьэ сырытта.
Күрэххэ уопсайа 13 командаттан (Дьокуускай, Алдан куораттартан, Нам, Томпо, Амма, Мэҥэ-Ханалас, Уус-Алдан, Чурапчы, Таатта, Хаҥалас, Горнай, Бүлүү, Сунтаар улуустарыттан) 200-тэн тахса киһи кыттыыны ылла.
Нам улууһун командата уопсай түмүккэ спорт 5, культурнай тэрээһиннэр 3 көрүҥнэригэр 1-кы миэстэни ылан кыайыылааҕынан таҕыста! Ол курдук, остуол оонньууларыгар, хабылыкка, хаамыскаҕа, дьахталларга Миронова Ф.Н. бастакы миэстэҕэ тахсан чемпион үрдүк аатын сүктэ, корнхоллга Иванова М.С. – бастакы миэстэни, Сивцев С.И. – иккис миэстэни, городкига Семенов Г.И. – 3 миэстэни, быа эрийээһинигэр Андросова Е.А – бастакы миэстэни ылары ситистилэр. Атын да кыттааччыларбыт бириистээх миэстэлэргэ тиксибэтэллэр даҕаны, 4,5,6,7 миэстэлэри ситиһэн командаҕа наадалаах очколары аҕаллылар.
Культурнай конкурстарга намнар эмиэ ситиһиилэннибит. Ол курдук, байыаннай ырыаҕа Нам командатын хора “Тыыннаахтар умнубат сыллара” ырыаны толорон 1-кы миэстэни аҕалла, солист – сыана бэтэрээнэ Иванов Иннокентий Иннокентьевич. Фольклор конкурсугар Неустроева С.Н., Соловьева А.А., Иванова В.В. састааптаах трио туттан-хаптан, күлүүлээхтик, сэргэхтик чабырҕахтаан көрөөччүлэр сэҥээриилэрин ылан 1-кы миэстэ буолары ситистэ.
Оһуохайы таһаарыыга Неустроева С.Н. 3-с бочуоттаах миэстэни ылары ситистэ. Улууспут командата бары сахалыы таҥастаах киирэн кынат буолан үөрэ-көтө оһуохайдаатыбыт.
Хамаандабыт уопсай түмүккэ бастаан сыаналаах бирииһинэн, 12 киһилээх надувной палатканан, кубогынан наҕараадаланна. Күммүт биһиэхэ анаан туран биэрдэ. Айылҕаҕа сылдьан, алгыс ылынан күүспүтүгэр күүс-уох эбинэн, ыарыыбытын умнан ситиһиилээхтик күрэхтэһэн кыайан-хотон астынан кэллибит.
Түгэнинэн туһанан, айаммытыгар сылын аайы күүс-көмө буолар, транспорынан, бензининэн хааччыйар улууспут баһылыгар Ю.И. Слепцовка, “ЭСО” салайааччытыгар В.В. Ядреевка, продуктанан көмөлөспүт “Нива”, “Туйаара”, “Сайылык”, “Дэлэй”, “Перекресток” маҕаһыыннар салайааччыларыгар улахан махталбытын тиэрдэбит, этэннэ сылдьыҥ, доруобуй буолуҥ!
Л.В. Собакина, УОВОИ адаптивнай спорка специалиһа
