Делегация састаабыгар растениеводство департаменын салайааччытын солбуйааччы Дьулустан Харлампьев, мелиорация управлениетын сүрүннүүр специалиһа Валерий Андреев бааллар.
Бастаан оробуочай бөлөх ИП Степан Терешкин бааһыналарыгар сылдьан былырыын граҥҥа кыайан ылбыт уу ыһар систематын уонна саҥа тутулла турар хотонун көрдө, салайааччылар үүнүү үчүгэйин бэлиэтээтилэр.
Хамаҕаттаҕа тиийэн Александр Жирков салайааччылаах «Саҥа сүүрээн» бааһынай хаһаайыстыба хортуоппуй, хаппыыста уонна оҕуруот аһын ыспыт бааһыналарын билистилэр. Александр Степанович былырыын федеральнай программанан ылбыт саҥа уу ыһар тэрилин 24 гаалаах сиргэ туруорбутун махтанан туран көрдөрдө.
Ол кэнниттэн Сахаяна Павлова Георгий Кривошапкин ыҥырыа иитэр хаһаайыстыбатын уонна дьэдьэн үүннэрэр теплицатын көрдө, ханнык программаларга кыттыаҕын сүбэлээтэ, улуустааҕы тыа хаһаайыстыбатын управлениетын салалтатыгар санаатын тиэртэ.
Салгыы оробуочай бөлөх улуус баһылыгын Юрий Слепцовы кытта көрүстэ. Юрий Иннокентьевич улуус тыатын хаһаайыстыбатын сайыннарыыга былааннаммыт үлэлэри билиһиннэрдэ. Сахаяна Павлова Нам улууһугар учуонайдары сыһыаран эһиилгиттэн дикоросстары, кустарниктары үүннэриигэ, сүөһү эбии аһылыгын бэлэмнээһиҥҥэ, хортуоппуй уонна оҕуруот аһын үүннэриигэ программаларга киирэн үлэлэһииҥҥэ болҕомтону тарта.
Бөтүҥҥэ тиийэн Надежда Попова салайааччылаах «Дайыына» бааһынай хаһаайыстыба сайылыгын көрдүлэр. Манна Сахаяна Павлова ынаҕы ыаһын механизацияланан, ыанньыксыт үлэтэ чэпчээбитин, хаһаайыстыба бааһыналарыгар үүнүү үчүгэйин бэлиэтээтэ, суданскай оттон уонна эбиэстэн аны күһүн күөх маассаны бэлэмнээһин үтүө түмүктэрдээх буоларыгар эрэлин биллэрдэ.
Салгыы Модукка тиийэн Дмитрий Попов уонна «Саха» ТХПК бааһыналарын уонна эбийиэктэрин билистилэр. Дмитрий Семенович уонна нэһилиэк баһылыга Ефим Гоголев инники былааннарын кэпсээтилэр.
Түмүккэ Сахаяна Павлова Нам улууһугар аны күһүн, хомуур саҕана, сүөһү эбии аһылыгын бэлэмнээһин уонна үүннэрии боппуруостарыгар кэлэ сылдьыаҕын уонна Александр Жирков хаһаайыстыбата чугастааҕы улуустары сиэмэ хортуоппуйунан хааччыйарын курдук түһээн түһэриллэрин туһунан эттэ.
