Хатыҥ Арыы оскуолата быйыл үгэс буолбут “Буойун» байыаннай-полевой, спортивнай лааҕырын үлэлэттэ. Сытыган диэн сиргэ улуус нэһилиэктэриттэн 9-14 саастаах 30 уол оҕону хабан лааҕыр 1 симиэнэ үлэлиир. Уолаттар 5 күн устата балаакканан хоно сытан байыаннай усулуобуйаҕа олорон аармыйа олоҕор үөрэнэллэр, өйү-санааны, эти-хааны сайыннарар араас дьарыктары ааһаллар.
Биэс үлэһит оҕо дьарыгын, сынньалаҥын тэрийэллэр. Ону сэргэ, байыаннай идэлээх дьон ыҥырыллан кэлэн идэлэргэ уһуйаллар. Бүгүн Дьокуускайдааҕы быыһыыр сулууспа үлэһиттэрэ ыалдьыттаан дьарык ыыттылар, лекция аахтылар. Бу күннэргэ ГАИ инспектордара идэлэрин билиһиннэриэхтэрэ, бойобуой дьайыы бэтэрээннэрэ Хорсун санаа уруоктарын ыытыахтара. Маны сэргэ эдэр байыастар строевой, огневой-тактическай бэлэми ааһаллар.
