От ыйын 15 күнүгэр М.К. Аммосов аатынан култуура уонна духуобунай сайдыы дыбарыаһыгар Нам улууһа барыта убаастыыр, ытыктыыр киһитэ, общественнай деятель, улуустааҕы бэтэрээн сэбиэтин бэрэссэдэтээлэ, СӨ норуотун хаһаайыстыбатын үтүөлээх үлэһитэ, Нам улууһун, Партизан нэһилиэгин бочуоттаах гражданина, Ленскэй нэһилиэгин бочуоттаах олохтооҕо Софья Дмитриевна Кобякова “Олоҕум кэрчиктэрин үтүө аргыстара” үбүлүөйдээх тэрээһинэ үөрүүлээх быһыыга-майгыга ыытылынна.
Тэрээһини “Үөдэй” тыа сирин түөлбэтин дьаһалтатын сүрүннүүр специалиһа Екатерина Эверстова Софья Дмитриевна 60-ча сыл үлэ үөһүгэр сылдьар кэрэ олоҕун, үтүө үлэтин-хамнаһын кэрдиис кэмнэрин ахтан-санаан олус истиҥник ыытта.
Софья Дмитриевна Кобякова дьоһун, улахан, убаастабылынан туһанар олоҕу олорон кэллэ. Кини олоҕун хас биирдии кэрдиис кэмэ таптыыр Намын улууһун, Сахатын республикатын историятын кытта ыкса сибээстээх. Софья Дмитриевна общественнай хамсааһыннары, түөлбэлэри сайыннарыыга үлэтэ-хамнаһа, ыччаты дойдуга бэриниилээх буолууга иитиигэ эстибэт эрчимэ уонна дойду, дьон-сэргэ туһугар бэриниилээх үлэтэ-хамнаһа барыбытыгар холобур буолар.
Кини ханна да үлэлээтэр, күүһүн-уоҕун, сатабылын барытын ууран, үлэ-хамнас ситиһиилээх буоларыгар мэлдьи туруулаһар. Ол курдук, эдэр сааһыттан “Нам” сопхуос оробуочайыттан саҕалаан тыа сирин үлэтигэр буспута-хаппыта. Кулууп сэбиэдиссэйинэн үлэлээн салайар үлэҕэ бастакы хардыыларын оҥорбута. Партизан Сэбиэтин исполкомун секретарынан, Намнааҕы райисполком тэрийэр отделын сэбиэдиссэйинэн, рапйисполком олохтоох дьаһалталары кытта үлэҕэ отделын сэбиэдиссэйинэн, Намнааҕы үөрэтэр-производственнай комбинат директорынан, Партизан нэһилиэгин баһылыгынан, “Знание” общество, ЗАГС сэбиэдиссэйдэринэн, Ленскэй нэһилиэк баһылыгын солбуйааччытынан, 2014 сылтан солбуллубат улуустааҕы бэтэрээн бэрэссэдээтэлинэн мэлдьитин күүһүн-уоххун, сатабылын барытын ууран, үлэтэ-хамнаһа ситиһиилээх буоларыгар туруулаһар. 2003 сыллаахха “Коробейники” нуучча ырыатын норуодунай ансаамбылын тэрийбитэ. ЗАГС сэбиэдиссэйинэн дьон-сэргэ махталын ылан үлэлээбитэ, Ленскэй нэһилиэк түөлбэлэрин үлэлэрин сатабыллаахтык тэрийбитэ.
Улуус бэтэрээннэрин Сэбиэтин бэрэссэдээтэлин быһыытынан аҕам саастаах дьоҥҥо болҕомтону, истиҥ кыһамньыны уурууга, кинилэр олохторун хаачыстыбатын тупсарыыга уопсастыбаннас болҕомтотун тардан, араас хабааннаах тэрээһиннэри тиһигин быспакка ыытыыга үлэлэһэр. Дьаһалта нэһилиэктэри кытары сөптөөх сыһыаны олохтоон, улууспут политическай, социальнай-экономическай, культурнай олоҕо, бэтэрээннэр хамсааһыннара сайдыытыгар сүҥкэн кылаатын киллэрэр, аҕам саастаах дьоммут олохторо чэпчиирин туһугар эрчимнээхтик үлэлиир-хамсыыр.
Үөрүүлээх түгэни Софья Дмитриевна төрөөбүт-үөскээбит төрүт сирин, Үөдэй нэһилиэгин, дьонун сахалыы үҥкүүтэ уонна “Иэйии” ветераннар кулууптарын эҕэрдэлэрэ астылар.
Улуус баһылыга Юрий Слепцов эҕэрдэ тылыгар Софья Дмитриевна ылыннарыылаах тылынан бэйэтин тула дьону түмэр дьоҕурун, өр сыллаах бэриниилээх үлэтинэн дьон-сэргэ ытыктабылын ыларын бэлиэтээтэ. Аҕа дойду сэриитигэр геройдуу охтубут, сураҕа суох сүппүт, сэрииттэн эргиллэн кэлэн эйэлээх олоҕу утуспут биир дойдулаахтарбыт, тыыл бэтэрээннэрин, сэрии оҕолорун ааттарын үйэтитиигэ бэриниилээх үлэтин иһин махталын тиэртэ.
Юрий Слепцов: “Бу сыллар тухары эн улахан общественнай үлэни – СР Киин быыбардыыр хамыыһыйатын чилиэнинэн, Нам улууһун территориальнай быыбардыыр хамыыһыйатын бэрэссэдээтэлинэн, СР норуоттар Ассамблеятын Намнааҕы салаатын эппиэттээх секретарынан, улуустааҕы дьахтар сэбиэтин бэрэссэдээтэлинэн, СР Баһылыгын итэҕэллээх киһитинэн – үтүө суобастаахтык толорон кэллиҥ. Эн киэҥ билиигэр, олоххо баай уопуккар, көлүөнэ ситимигэр сүбэ-ама буоларгар махтанан сүгүрүйэбит, ытыктабылбытын биллэрэбит. Киэҥ-холку, хайдах да ыарахантан чаҕыйбат, ыктарыылаах да кэмнэргэ ыгылыйбат майгыҥ, тулалыыр дьоҥҥор-сэргэҕэр эйэ-дэмнээх, дьиҥ чахчы доҕордуу сыһыаныҥ өрүү холобур буолаллар. Түгэнинэн туһанан, биир дойдулаахтарбыт, уһулуччулаах государственнай деятеллэр Максим Кирович Аммосов, Илья Егорович Винокуров, Аҕа дойду Улуу сэриитигэр хорсуннук сэриилэспит буойуттарбыт ааттарын үйэтитэр, анал байыаннай дьайыы бара турар кэмигэр биир дойдулаах буойуттарбытыгар көмөҥ иһин барҕа махталбын тиэрдэбин”.
Бу күн Софья Дмитриевнаны Саха сирин үрдүкү салалтата, киэн туттар биир дойдулаахпыт, СӨ Государственнай Мунньаҕын (Ил Түмэн) бэрэссэдээтэлэ Алексей Еремеев, күндү ыалдьыт буолан эҕэрдэ истиҥ тылларын анаата, Ил Түмэн Бочуотунай грамотатын туттарда.
Ил Түмэн тыа сиригэр уонна аграрнай бэлиитикэҕэ сис кэмитиэтин бэрэссэдээтэлэ Александр Атласов эҕэрдэлээн туран, Софья Дмитриевна сүбэтин-аматын, таһаарыылаах үлэтин иһин махталын тиэртэ, улуус социальнай-экономическай олоҕор улахан кылаатын бэлиэтээтэ.
Үөдэй, Партизан нэһилиэктэриттэн бииргэ үөрэммит доҕотторо истиҥ дьүөгэлэригэр, эрэллээх доҕордоругар, сүбэһиттэригэр, куруук күүс-көмө, өйөбүл буолар киһилэригэр үтүө-мааны тыллары анаатылар.
Хатырык орто оскуолатыгар үөрэппит оҕолоро учууталларыгар эҕэрдэ бастыҥын, ырыа ылбаҕайын бэлэх ууннулар.
Райисполком тэрийэр отделын сэбиэдиссэйинэн үлэлиир сылларыгар бииргэ үлэлээбит дьоно сэбиэскэй кэмҥэ өрө күүрүүлээх үлэни өрө туппут кэмнэрин ахтан-санаан аастылар
Партизан нэһилиэгин баһылыга Зырянов Алексей эҕэрдэ тылларын эттэ, кинини салгыы “Дьүрүл” фольклорный ансаамбыл, “Күбэйэ” үҥкүү ансаамбыла уруйдаатылар-айхаллаатылар. Алексей Зырянов Софья Дмитриевна Партизан нэһилиэгин баһылыгынан үлэлиир кэмнэригэр общественность өрө күүрүүлээх үлэтин тэрийбитин бэлиэтээн эттэ.
СӨ Үлэ уонна социальнай сайдыы министиэристибэтин иһинэн үлэлиир “Кыайыы” социальнай харысхал ресурснай киин директора Галина Лебедева Софья Кобякова салайар Нам улууһун бэтэрээннэрин сэбиэтэ республикаҕа биир биллэр-көстөр үлэлээх тэрээһин буоларын эттэ уонна “СӨ социальнай сулууспатын туйгуна” бэлиэни туттарда.
Галина Лебедева: “Биһиги тэрилтэбит 2017 сылтан “Бэтэрээн” өрөспүүбүлүкэтээҕи ассоциацияны кытта “Көхтөөх сааһырыы – актыыбынай уонна муударай дьон кэмэ” диэн социальнай бырагыраамаҕа үлэлэһэбит. Икки сыллааҕыта «Үрүҥ көмүс сынньалаҥ» («Серебряные каникулы») диэн бырайыагы суруйан, Ил Дархан граныгар кыайбыппыт. Нам улууһун баһылыга Юрий Иннокентьевич уонна Софья Дмитриевна өйөөһүннэринэн, бу бырайыак чэрчитинэн Намнааҕы педагогическай колледжка бастакы пилотнай лааҕырбыт ситиһиилээхтик үлэлээбитэ”.
Улуус тэрилтэлэрин салайааччылара, Арктикатааҕы государственнай агротехнологическай университет ойуур комплексын факультетын декана Мария Владимировна Слепцова, үөрэх управлениета, тэрилтэлэрэ истиҥ тылларын тиэртилэр.
Улуустааҕы үөрэх управлениетын начальнигын солбуйааччы Светлана Поротова Софья Кобякова үүнэр көлүөнэни иитиигэ өр сыллаах бэриниилээх үлэтин бэлиэтээн туран, “За вклад в развитии системы образования Намского улуса” бэлиэни туттарда.
Николай Григорьевич Парников дьиэ кэргэнин, “Үөдэй” общественнай түмсүү, И.С. Гаврильев аат. Нам 1 №-дээх орто оскуолатын, Намнааҕы территориальнай быыбардыыр хамыыһыйа ааттарыттан эҕэрдэлээн туран, СӨ киин быыбардыыр хамыыһыйатын Бочуотунай грамотатын туттарда.
Улуустааҕы архыыптан Антонина Корнилова Софья Дмитриевна үлэтин кэрчик кэмнэрин туоһулуур докумуоннары ааҕан иһитиннэрдэ, махтал суругун анаата.
Софья Дмитриевна бииргэ үлэлэһэр тэрилтэтэ, тапталлаах кэргэнэ Андрей Андреевич Кобяков салайбыт, үлэлээбит “Намкоммунтеплоэнерго” тэрилтэтин генеральнай дириэктэрэ Николай Игнатьев эҕэрдэлээтэ.
Нэһилиэктэр баһылыктара, улуус управлениеларын салайааччылара, Ленскэй нэһилиэк түөлбэлэрин салайааччылара эҕэрдэ тылларын анаан туран, наҕараадаларын, бэлэхтэрин туттардылар.
Улуустааҕы тыа хаһаайыстыба управлениетын салайааччыта Владимир Макаров «Нам улууһун агропромышленнай комплексын сайыннарыыга кылаатын иһин” бэлиэни туттарда.
Софья Дмитриевна куруук күүс-көмө буолар, биир санаанан үлэлиир нэһилиэк баһылыктарыгар махталын тиэртэ. Бу күн биир бэлиэ түгэнинэн Ленскэй нэһилиэк 15 түөлбэтин аатыттан эҕэрдэ анаммыта буолла.
Улуустааҕы культура управлениетын салайааччы Семен Ядрихинскай, П.И. Сивцев аатынан Намнааҕы история уонна этнография музейын директора Александр Копырин, Н.М. Рыкунов аатынан Намнааҕы киин библиотека үлэһиттэрэ, Түбэ нэһилиэгин сынньанар киинин директора Дария Попова, “Эҥсиэли” хаһыат редакцията эҕэрдэ, махтал тылларын эттилэр.
СӨ государственнай филармониятын солиһа Петр Попов “Эҕэрдэ ырыата” ырыаны бэлэхтээн тэрээһини киэргэттэ, ис хоһоонун ситэрэн-хоторон биэрдэ. Улуустааҕы бэтэрээн сэбиэтин Президиума, нэһилиэктэр бэтэрээннэрин сэбиэттэрэ уруй-айхал тылларын тиэртилэр. Хамаҕатта нэһилиэгин бэтэрээннэрин сэбиэтин бэрэссэдээтэлэ Сандаара Оротоо “Ангел хранитель мой” ырыатын бэлэх уунна.
Түмүккэ Софья Дмитриевна нэһилиэктэр бэтэрээннэрин сэбиэттэрин салайааччыларыгар махтанан туран бэйэтин бэлэҕин туттарда.
