Мунньахха улуустааҕы култуура уонна духуобунай сайдыы управлениетын начальнига Семен Ядрихинскай, Ленскэй нэһилиэк баһылыга Петр Сокольников, улуус дьаһалтатын капитальнай тутуу отделын начальнига Александра Маркова, муниципальнай баайы-дуолу салайар управление (КУМИ) директорын солбуйааччы Алексей Аммосов, “Сахатранснефтегаз” Намнааҕы салаатын начальнигын солбуйааччы Алексей Попов, Намнааҕы РЭС начальнига Анатолий Васильев, култуура тэрилтэлэрин үлэһиттэрэ кыттыыны ыллылар.
Бу күн улуус киинигэр «Эҥсиэли» сынньалаҥ пааркатыгар силбэһэ турар Маастардар дэриэбинэлэрин суолун-ииһин оҥорон, гаас ситимин киллэрэн, атыылыыр павильоннары тутан сөргүтэн үлэлэтии туһунан кэпсэтии барда.
Бырайыак олоххо киирдэҕинэ, манна Илиинэн уһаныы дьиэтэ (Дом ремесел) тэриллэн тимир уустара, ииһинэн, туойунан дьарыктанар илиилэригэр дьоҕурдаах дьоммут айар-тутар, оҥоһуктарын атыылыыр, нэһилиэнньэ тоҕуоруһа сылдьар кэрэхсэбиллээх сирэ үлэлиэҕэ.
Сүбэ мунньах түмүгүнэн улуус баһылыга Юрий Слепцов суол оҥоруутун 2026 сыллаах былааҥҥа киллэрэргэ, Намнааҕы бизнес-киин бырайыагы саҥардан силигин ситэрэригэр сорудахтаата.
