Нам сэлиэнньэтигэр сайыҥҥы кэмҥэ тохтоло суох түүҥҥү рейдэлэр ыытыллаллар. Сайыҥҥы кэмҥэ сокуоннай сааһын туола илик оҕо 23.00-06.00 чч бириэмэҕэ уопсастыбаннай сиргэ төрөппүтэ суох тахсыа суохтаах.

Бу күннэргэ Намнааҕы психологическай киинтэн Нюргуяна Михайловна Аргунова, старшай инспектор Ньургуяна Андреевна Николаева уонна Ленскэй нэһилиэк олохтоох дьаһалтатын үлэһиттэрэ Анна Ильинична Слепцова, Дьулустаан Алексеевич Макаров бэрээдэк олохтуур түүҥҥү рейдэҕэ сырыттылар.

Рейдэ түмүгүнэн, түөрт оҕоҕо акт оҥоһуллубут. Тустаах үлэһиттэр түөрт оҕону төрөппүттэригэр, дьиэлэригэр илдьэн биэрбиттэр. Бириэмэни кэспиттэр Намнааҕы 1-кы нүөмэрдээх оскуола үөрэнээччилэрэ буолаллара этиллэр. Үчүгэйи-куһаҕаны араара үөрэммит кыргыттар бэйэлэрэ дьиэлэрин суолларын туппуттар. Ону тэҥэ, Нам сэлиэнньэтигэр ыалдьыттыы кэлбит Үөдэй оҕото баара чопчуламмыт.

Ол түүн мотоциклаах оҕолор мүлчү туттарбыттар, суолларын омоонун эрэ көрөн хаалбыттар. Тоһоҕолоотоххо, оҕо мотоциклга бырааба, көҥүлэ суох ыытара көҥүллэммэт! Утуйар кэмҥэ тыас-уус дэлби таһааралларыттан олохтоохтор, аҕам саастаахтар эрэйи көрөллөрө бэлиэтэнэр. Өскөтүн, ыытар бырааба, көҥүлэ суох оҕо тутуллар түгэнигэр мотоциклын былдьатыаҕа, төрөппүттэрэ административнай миэрэҕэ тардыллыахтара.

Рейдэ үөрэх кэмэ саҕаланыар диэри тохтообокко ыытыллыаҕа. Ленскэй нэһилиэк үлэһиттэрин кытта Нам улууһун дьиэ кэргэн уонна ыччат политикатын отделын сүрүн специалиһа Матрена Ильинична Охлопкова сэлиэнньэ уопсастыбаннай сирдэригэр көрүү-истии, бэрэбиэркэ, хонтуруол үлэтин ыыталлар.