Бастаан Нам сэлиэнньэтигэр «Хатырык килиэбинэн» хааччыйар урбаанньыт Петр Прокопьевка солбуйааччыта Филипп Николаев уонна улуустааҕы тыа хаһаайыстыбатын салалтатын салайааччытын солбуйааччы Юрий Петров буолан сырыттылар.

Урбаанньыт бэкээринэтигэр күҥҥэ 1500 килиэп астаан таһааран, Хатырыкка уонна Бастакы Хомустаахха тиийэ, уопсайа 30 эргиэн туочукаларыгар батарар.

Петр Петрович кыыһын кытта салгыы туох былааннаахтарын кэпсээтилэр. Билигин күөх төлөн боппуруоһа сытыытык турар эбит. Инникитин электрическэй оһоҕу ылан, кондитерскай бородууксуйа оҥорон таһаарар былааннаахтар.

Юрий Иннокентьевич тустаах салайааччыларга бу урбаанньыты кытта үлэлэһэн, олохтоох оҥорон таһаарыы сайдыытын сирин-уотун тэрийиигэ (ТРМП) резидент быһыытынан киллэрэргэ үлэлэһиҥ диэн сорудахтаата.

Салгыы «Намская» халбаһынан киэҥник биллибит, соторутааҕыта ТРМП резиденэ буолбут Дмитрий Аргунов сыаҕар сырыттылар. Дмитрий Дмитриевич сыаҕын техникаларын быһааран көрдөрдө. Туох былааннааҕын иһитиннэрдэ.

Билигин Нам сэлиэнньэтигэр эбии сыах тутта сылдьарын көрдөрдө. Сыаҕын бу сылга үлэҕэ киллэрэр уонна бородууксуйатын өссө элбэтэр былааннааҕын сиһилии кэпсээтэ.

Улуус баһылыга Юрий Слепцов Нам сэлиэнньэтигэр тутуллубут Н.В. Дьяконов аатынан спорт национальнай көрүҥнэрин киинин баран көрдө. Манна бастакы солбуйааччыта Анатолий Павлов уонна улуустааҕы биир кэлим сакаасчыт директора Алексей Кондаков сылдьыстылар, объегы көрдөрдүлэр.

Юрий Иннокентьевич объегы көрөн баран, кыра хаалбыт үүлэлэри тиһэҕэр тиэрдэн, үлэни бүтэрэн, бу сылга киллэриэххэ наада диэн эттэ. Манна дэгит күрэһинэн уонна ох саанан үлүһүйэр спортсменнар кэлэн дьарыктаныахтара, спорт күрэхтэригэр бэлэмнэниэхтэрэ.