От ыйын 18 күнүгэр улуустааҕы социальнай харалта салалтатын салайааччыта Людмила Петрова Нам улууһун Ытык киһитигэр, ССРС культуратын туйгунугар, СР культуратын үтүөлээх үлэһитигэр Татьяна Андреевна Гурьеваҕа ыалдьыттаата уонна өйдөбүнньүк кэрэ бэйэлээх сахалыы иһити бэлэхтээтэ. Үтүө дьыала хамсааһыныгар волонтер оҕолор кыттыһан, оҕуруотугар көмөлөстүлэр.
Татьяна Андреевна быйыл 88 сааһын лоп-бааччы туолла. Аас-туор олоҕу ааспыт ытык кырдьаҕас Кыайыы сылын көрсө бэлэх тутан олус уйадыйда. Үүнэр көлүөнэҕэ эдэр эрчимнээх саастарын, билиҥҥи олох ыарахан сыананан кэлбитин, историяны илдьэ сылдьыахтаахтарын туһунан кэпсээтэ. Сэрии кэмин ойуулуур хартыыналардаах саха иһитин анала үлэ киһитин уруйдуур, куруук дэлэй астаах сандалылаах буолуҥ диэн алгыстанан оҥоһуллубут аналлаах диэн санаатын эттэ.
Үтүө көмөһүт оҕолор Татьяна Андреевнаттан араас ыйытыылары биэрэн долгуттулар. Хас биирдии ыйытыыга ытык киһибит ис сүрэҕиттэн иэйэн, ол кэминээҕи сылларын ахтан-санаан үөрэн-долгуйан хоруйдаата, үтүө сүбэлэри биэрдэ.
