Ааспыт нэдиэлэҕэ, балаҕан ыйын 5 күнүгэр, улуус дьаһалтатын актовай саалатыгар улуустааҕы дьахтар Сэбиэтин сүбэ мунньаҕа буолла. Мунньахха балаҕан ыйын 9-10 күннэригэр Дьокуускайга ыытыллар «Гражданскай общество: Кыайыы аатыгар түмсүү» гражданскай форумҥа кыттыы боппуруостарын тула кэпсэттилэр. Форумҥа Нам улууһуттан 25 киһи кыттыыны ылыаҕа. Сарсын, балаҕан ыйын 9 күнүгэр, делегация коммерческайа суох сектор сайдыытын боппуруостарыгар «Президент граннарын Фондатын куонкурустарыгар кыттар уонна кыайар кыахтара» площадкаҕа өрөспүүбүлүкэҕэ олоххо киллэриллэр бырайыактарга грант өйөбүлүн ылыы механизмнарын дьүүллэһиигэ кыттыаҕа уонна бу боппуруоска билиилэрин хаҥатыахтара. Балаҕан ыйын 10 күнүгэр форум үлэтэ биэс площадканан салҕаныа.
Үгэстэри харыстааһыҥҥа уонна бигэ обществоны үөскэтиигэ элбэх көлүөнэлээх дьиэ кэргэн оруолугар ананар площадкаҕа ыытыллар куонкуруска Партизан нэһилиэгиттэн Туйаара Евстратьевна уонна Петр Афанасьевич Баишевтар бааһынай хаһаайыстыба дьиэ кэргэнэ кыттыыны ылыаҕа. «Общество көҕүлээһиннэрин оруола» секцияҕа өрөспүүбүлүкэ улуустарын уонна куораттарын бастыҥ практикалара билиһиннэриллиэхтэрэ, инициативнай бырайыактар социальнай суолталаах соруктары быһаарыыга хайдах көмөлөһөллөрүн көрдөрүөхтэрэ. Маны сэргэ «Об общих принципах организации местного самоуправления в единой системе публичной власти» диэн саҥа федеральнай сокуону олоххо киллэрии уонна Саха сирин усулуобуйатыгар туһаныы суолларын дьүүллэһии ыытыллыаҕа. Анал байыаннай дьайыы кыттыылаахтарын, бэтэрээннэрин уонна кинилэр дьиэ кэргэттэрин өйөөһүҥҥэ ураты болҕомто ууруллуоҕа. Экспертэр уонна общественнай тэрилтэлэр өйөбүл дьаһалларын, социальнай көмүскэл механизмнарын уонна бу үлэҕэ гражданскай общество кыттыытын кыаҕын дьүүллэһиэхтэрэ.
Хатырык нэһилиэгиттэн Саха Өрөспүүбүлүкэтин уус-уран оҥоһугун маастардара Тамара Галиновна уонна Валентин Титович Васильевтар уонна кинилэр оҕолорун туоһунан үлэлэрэ быыстапкаҕа туруохтара. Форумҥа былаас уорганнара, коммерческайа суох тэрилтэлэр, общественнай түмсүүлэр, үөрэх тэрилтэлэрэ уонна көҕүлүүр гражданнар бэрэстэбиитэллэрэ кыттыахтара. Тэрээһин сүрүн сыала – соруга – патриотическай иитии, историческай өйү-санааны харыстааһын уонна социальнай көҕүлээһиннэри өйөөһүн боппуруостарыгар гражданскай обществоны түмүү буолар.
“Нам улууһа” МО пресс – сулууспата
