Балаҕан ыйын 14 күнүгэр, баскыһыанньаҕа, Нам улууһугар муниципальнай таһымнаах быыбар ыытыллар.

Бу күҥҥэ быыбардыыр учаастактар сарсыарда 8:00-тан киэһээ 20:00 чааска диэри үлэлиэхтэрэ. Маймаҕа, Бөтүҥ, Көбөкөн нэһилиэктэрин олохтоохторо баһылыктарын быыбардыахтара. Маймаҕа нэһилиэгин баһылыгар 3, Бөтүҥҥэ – 3, Көбөкөҥҥө – 2 кандидаттар турдулар. Мантан олохтоохтор нэһилиэктэригэр биирдии кандидаты талыахтара.

Партизааҥҥа, Маймаҕаҕа, Көбөкөҥҥө, Искраҕа, Хатырыкка олохтоохтор нэһилиэк Сэбиэтин депутаттарын быыбардыахтара.

Маны таһынан, улуус депутаттарын Сэбиэтигэр эбии быыбарга: Хамаҕаттатааҕы икки мандааттаах 3 №-дээх уонна 8 №-дээх «Нэлэгэр» биир мандааттаах быыбардыыр уокуруктарга «Нам улууһа» муниципальнай оройуон Мунньаҕар депутаттары куоластыахтара.

«Нам улууһа» муниципальнай оройуон Мунньаҕар депутакка Хамаҕаттатааҕы икки мандааттаах 3 №-дээх быыбардыыр уокурукка – 3 кандидат, 8 №-дээх «Нэлэгэр» биир мандааттаах быыбардыыр уокурукка 3 кандидат турда.

Антонина Корнилова, Намнааҕы ТИК бэрэссэдээтэлин э.т.:

– Учаастактааҕы комиссиялар үлэлэрин атырдьах ыйын 30 күнүттэн саҕалаабыттар.

Балаҕан ыйын 1 – 2 күннэригэр бюллетеннэр учаастактааҕы комиссияларга тарҕаммыттара.

Эрдэ куоластааһын (Предварительное голосование) балаҕан ыйын 3 күнүттэн саҕаламмыта уонна 13 күнүгэр диэри салҕанан барар. Балаҕан ыйын 10 күнүн туругунан эрдэ 28 быыбардааччы куоластаата. Быыбар агитацията, быыбар саҕаланыан биир күн иннинэ, ол эбэтэр балаҕан ыйын 12 күнүгэр, түүн 24:00 ч. түмүктэнэр.

Кэтээн көрөөччүлэр (наблюдатели) испииһэктэрэ бэҕэһээ, балаҕан ыйын 10 күнүнэн, оҥоһуллан түмүктэннэ.

Намнааҕы территориальнай, учаастактааҕы быыбардыыр комиссиялар, тустаах тэрилтэ үлэһиттэрэ бары быыбар этэҥҥэ, сокуону тутуһан ааһарыгар үлэлииргэ бэлэмнэр.

Убаастабыллаах Нам улууһун олохтоохторо! РФ Төрүт сокуонунан бэриллибит быраапкытын туһанан быыбарга көхтөөх кыттыыны ыларгытыгар ыҥырабыт.

«Нам улууһа» МО пресс-сулууспата