Бүгүн, балаҕан ыйын 14 күнүгэр, Көбөкөн нэһилиэгэр үөрүүлээх бэлиэ күн буолла. Ол курдук нэһилиэккэ киириигэ саҥа стела оҥоһуллан үөрүүлээх быһыыга-майгыга арылынна.
Тэрээһин саҕаланыыта сахалыы сиэри-туому тутуһан Иван Егорович Потапов алгыс тыл эттэ. Нэһилиэк Ытык киһитэ Федотова Ирина Семеновна Көбөкөн баай дириҥ историятын кэпсээтэ, баһылык Гаврил Гоголев эҕэрдэ тыл эттэ уонна стеланы туппут урбаанньыкка Степан Петровка Махтал сурук туттарда. Талааннаах ырыаһыттар Ян Чоросов, Кирилл Матвеев, Николай Шапов эҕэрдэ ырыаларын бэлэхтээтилэр.
Хараҥардаҕына, чаҕылхай уотунан сырдатыы оҥоһуллубута, нэһилиэк олохтоохторун олус үөртэ. Стелаҕа сэттэ ини-бии көбөкөттөр, хорсун-хоодуот түҥ саха буойун уолаттара аттаах туралларын ойуута көстөр.
История кэрэһэлииринэн көбөкөттөр өбүгэлэрэ – Бөрө Бөтүҥнэр – Саха сирин биир улахан биис ууһун ахсааныгар киирсэллэр.
Стела бэйэ көҕүлээһинин өйүүр программа (ППМИ) чэрчитинэн тутуллунна.
“Нам улууһа” МО пресс – сулууспата
