Бүгүҥҥү, балаҕан ыйын 15 күнүнээҕи, планерканы улуус баһылыгын э.т. Анатолий Павлов салайан ыытта.
«Намкоммунтеплоэнерго» АО генеральнай директора Николай Игнатьев оттук сезона балаҕан ыйын 12 күнүттэн саҕаламмытын туһунан иһитиннэрдэ. Бары объектарга итии 100% холбонно.
Улуустааҕы киин балыыһа кылаабынай бырааһа Ариан Сергеев иһитиннэрбитинэн, ааспыт нэдиэлэҕэ көһө сылдьар быраастар биригээдэлэрэ нэһилиэктэргэ үлэлээтэ, бу нэдиэлэҕэ эмиэ график быһыытынан олохтоохтору көрүөхтэрэ. Граф Биэрэгэр саҥа фелдьшерскэй-акушерскай уонна Маймаҕаҕа фельдшерскэй пууннар үлэҕэ киирдилэр.
Роспотребнадзор Намнааҕы салаатын салайааччыта Марфа Игнатьева иһитиннэрбитинэн, ааспыт нэдиэлэҕэ норовируһунан ыалдьыы 4 түбэлтэтэ, ыкка ытыттарыы 2 түбэлтэтэ бэлиэтэммит. Ону таһынан саҥа коронавируһунан 4 киһи ыалдьыбыт. Прививочнай кампания салҕанар. Тэрилтэ салайааччылара болҕомтоҕо ууран үлэһиттэр быһыы ылалларын тэрийиэххэ наадатын эттэ.
Намнааҕы ТИК председателин э.т. Антонина Корнилова быыбар этэҥҥэ ааспытын туһунан иһитиннэрдэ уонна түмүктэри билиһиннэрдэ.
Улуустааҕы үөрэх салалтатын салайааччыта Мария Игнатьева бу күнтэн үөрэх штатнай режиминэн саҕаламмытын туһунан иһитиннэрдэ. Бу иннинэ оскуолаларга уонна уһуйааннарга температурнай режим тымныы буолан, араас тэрээһиннэр, слеттар, доруобуйа күннэрэ ыытыллыбыттар. Билигин ОГЭ, ЕГЭ хат туттарыыта ыытыллар. Улууска үөррэх эйгэтигэр методическай десант былааннанар. Бу десаҥҥа нэһилиэктэр үөрэх тэрилтэлэрин кэрийиэхтэрэ. Десант сүрүн соруга – үөрэх хаачыстыбатын үрдэтии.
Россиятааҕы социальнай фонда Намнааҕы клиентскэй сулууспатын салайааччыта Евгений Бурцев балаҕан ыйын 18 күнүгэр сарсыарда 9:00 чаастан тэрилтэ дьиэтигэр «День единого пособия» акция ыытылларын туһунан эттэ. Бу күн тустаах специалистар олохтоохтор ыйытыыларыгар толору хоруйдуохтара, консультация биэриэхтэрэ.
От үлэтэ түмүктэнэн эрэрин, хомуур үлэтэ салҕанарын туһунан улуустааҕы тыа хаһаайыстыбатын салалтатын салайааччытын солбуйааччы Юрий Петров иһитиннэрдэ.
Улуустааҕы социальнай харалта салалтатын салайааччыта Людмила Петрова социальнай контракка квота хаалбытын, тэрилтэ салайааччылара үлэҕэ ылаары сылдьан дьоннорун хайаан да социальнай харалтаҕа консультацияҕа ыыталларыгар эттэ.
Ааспыт нэдиэлэҕэ Хатырыктан 10-ча км сиргэ ойуур баһаара бэлиэтэммит. Маныаха буруйдаах киһини көрдөөһүн үлэтэ салҕанар. Анатолий Иванович күһүн сылаас буоларынан, баһаары утары профилактическай үлэ өссө күүһүрэригэр сорудахтаата. Нэһилиэнньэҕэ өйдөтөр-сэрэтэр үлэ тиһигин быспакка ыыттылыахтааҕын санатан эттэ.
