М.К. Аммосов аатынан культура уонна духуобунай сайдыы дыбарыаһыгар сарсыардаттан аҕам саастаахтарга анал консультациялар уонна Намнааҕы киин балыыһа быраастара медицинскэй көрүү ыытан саҕалаатылар.
Консультацияҕа улуустааҕы социальнай харалта, социальнай фонда Намнааҕы филиала уонна Т.К. Ядрихинская аатынан Намнааҕы социальнай-геронтологическай киин үлэһиттэрэ аҕам саастаахтар ыйытыыларыгар хоруйдаатылар, сүбэ-ама биэрдилэр.
Аҕам саастаах дьон сүрүннээн киин балыыһа үлэһиттэригэр уочараттаан киирэллэр. Манна артерия, харах давлениеларын кэмнэтэллэр, хаан аналиһын туттараллар, уопсай туруктарын бэрэбиэркэлэтэллэр. Маны таһынан урбаанньыттар Дмитрий Аргунов минньигэс халбаһылара, Людмила Уваровская киэргэллэрэ атыыга турдулар.
Декада үөрүүлээх арыллыыта күнүс 12 чаастан буолуоҕа. Декада устата нэһилиэктэргэ, тэрилтэлэргэ араас хабааннаах киэҥ программалаах тэрээһиннэр ыытыллыахтара. Бу күннэргэ ытык дьоммутугар болҕомтобутун өссө күүһүрдэн кинилэргэ көмөлөһүөххэ, үйэлэрин уһатыахха.
