Бүгүн, алтынньы 6 күнүгэр, бэнидиэнньиктээҕи планерка мунньаҕы улуус баһылыгын э.т. Анатолий Павлов салайан ыытта.
- Улуустааҕы киин балыыһа кылаабынай бырааһа Ариан Сергеев иһитиннэрбитинэн, улуус үрдүнэн грипп утары вакцинацияны ылыы көрдөрүүтэ улахан дьоҥҥо 38 %, оҕолорго – 88 % тэҥнэспит.
- Ааспыт нэдиэлэҕэ 86 киһи суһал көмөҕө наадыйбыт, мантан 28-һа оҕо.
- Алтынньы 7 күнүгэр 1 Хомустаах, 9 күнүгэр Хатырык нэһилиэктэригэр Намнааҕы киин балыыһа медүлэһиттэрэ аҕам саастаах дьону көрүөхтэрэ.
- Ыарыыны эрдэттэн булар, сэрэтэр инниттэн нэһилиэнньэ диспансеризацияны ааһара наадалаҕын, тэрилтэ салайааччылара сайаапка түһэрдэхтэринэ, быраастар тэрилтэҕэ кэлэн үлэһиттэри көрөллөрүн, анализ ылалларын санатта.
- Тыа хаһаайыстыбатын управлениетын начальнига Владимир Макаров иһитиннэрбитинэн, СӨ тыатын хаһаайыстыбатын министиэристибэтин кытта үүтү туттарыыга эбии Сөбүлэҥ түһэрсэргэ үлэ барар. 2025 сылтан муниципальнай тэриллиилэргэ киэҥ боломуочуйа бэриллибитэ. Ол чэрчитинэн, улуус дьаһалтата “Малые сельскохозяйственные объекты” диэн программанан сүөһү турар хотонун тутууга куонкурус биллэрбитэ. Кыайыылаахтар биллэн, үбүлээһин 30% – на төлөнөн, 1- кы Хомустаах, Фрунзе уонна Аппааны бааһынай хаһаайыстыбаларыгар хотоннор тутуулара саҕаланан хотоннор каркастара турбут. Бу күн туругунан үп – харчы боппуруоһуттан иҥнэн хотоннор салгыы тутуулара тохтообут.
- Улуустааҕы үөрэх управлениетын салайааччыта Мария Игнатьева, улуустааҕы “Норуот үөрэҕириитин” музейа уонна улуустааҕы психологическай киин Ст.Платонов 14/1 № – дээх уулуссаҕа хонтуораланан үлэлиир буолбуттарын иһитиннэрдэ.
- Улуустааҕы үөрэх салаатыгар оптимизация ыытылларынан саҥа штатнай расписание оҥоһулла сылдьарын уонна алтынньы 13 күнүгэр бу боппуруоска СӨ Үөрэҕин уонна наукатын министиэристибэтэ ВКС нөҥүө ыытар мунньаҕар бэлэмнэнэллэрин эттэ.
- Ийэ дойдубут интэриэһин көмүскээһиҥҥэ ытык иэстэрин толоро сылдьар биир дойдулаахтарбытыгар көмө – өйөбүл акция алтынньы ый 17 күнүгэр ыытыллара былааннанар.
- Нам улууһугар алтынньы 7 күнүттэн коммерческайа суох сыаллаах туһаныллар кыра кыамталаах суудуналарга навигация тохтуур.
- Намнааҕы социальнай харалта управлениетын салайааччыта Людмила Петрова үлэ көрдөөһүн хайысхатыгар социальнай контракт түһэрсэргэ ыҥырда. Ол курдук, бу хайысхаҕа 10 квота баарын эттэ. Ону тэҥэ, кэтэх хаһаайыстыба тэриниигэ, сүөһү, техника атыылаһыыга – 7, бэйэ дьыалатын тэриниигэ – 9 квота баарын иһитиннэрдэ.
- Дьиэ кэргэн уонна ыччат отделын салайааччыта Екатерина Евстафьева иһитиннэрбитинэн, Аҕам саастаах дьон күннэрин чэрчитинэн декада тэрээһиннээхтик ыытылла турар.
- Алтынньы 8 күнүгэр М.К. Аммосов аатынан культура уонна духуобунай сайдыы дыбарыаhыгар Н.М. Рыкунов аатынан Намнааҕы киин библиотека конференц – саалатыгар «Нам улууһа” МО баһылыга Юрий Слепцов кыттыылаах төгүрүк остуол ыытыллыаҕа. Тэрээһиҥҥэ нэһилиэктэр бэтэрээн Сэбиэттэрин бэрэссэдээтэллэрэ, баһылыктара, общественнай тэрилтэлэр салайааччылара кыттыыны ылыахтара.
«Нам улууһа» МО пресс-сулууспата
