Бу бэлиэ күн Россия уонна Саха сирин бастыҥ көрдөрүүлээх учууталларыгар ананар бириэмийэлэри туттарыы үөрүүлээх түгэнэ буолла. Дойду Президенэ Владимир Путин уурааҕынан 2006 сылтан Россия үөрэҕириитин министиэристибэтэ дойдубут араас регионнарын 1250 бастыҥ үлэлээх учууталларыгар бириэмийэлэри туттарар.
2024 сыл түмүгүнэн бу бириэмийэни Сахабыт сирин 9 улууһуттан 12 учууталга СӨ Бырабыыталыстыбатын бэрэссэдээтэлин солбуйааччы Анатолий Семенов үөрүүлээх быһыыга – майгыга туттарда.
Биһиги улууспутуттан Намнааҕы 2 № -дээх орто оскуолатын математика учуутала Надежда Ивановна Ли бириэмийэ лауреата үрдүк аатын ылар чиэскэ тиксэн 200 тыһ. солкуобай гранынан наҕараадаланна.
СӨ Ил Дархана Айсен Николаев көҕүлээһининэн педагог идэтин социальнай суолтатын уонна аатын үрдэтэр инниттэн идэлээх үлэһит быһыытынан ситиһиилээх, эдэрдэри уһуйуунан дьарыктанар уопуттаах педагогтарга «Бастыҥ педагог – наставник” бириэмийэ олохтоммута.
2024 сыл түмүгүнэн республика 35 улууһуттан уонна куоратыттан 35 педагог “Бастыҥ педагог – наставник” аатын сүгэн 100-түү тыһ. солк. суумалаах бириэмийэлэри туттулар.
Нам улууһуттан бу үрдүк аат өр сылларга таһаарыылаахтык үлэлии-хамсыы сылдьар Н.С.Охлопков аатынан улуустааҕы гимназия биология учуутала Вера Михайловна Федороваҕа иҥэрилиннэ.
Бөтүҥ орто оскуолатын дириэктэрэ Александр Гаврильевич Дмитриев СӨ Ил Түмэнин Бочуотунай грамотатынан наҕараадаланна.
Наҕараадаламмыт учууталлар үөрэнээччилэрэ республика, Россия таһымнаах научнай-практическай ааҕыыларга, олимпиадаларга, куонкурустарга куруук инники күөҥҥэ сылдьаллар. Бу барыта кинилэр уһун сылларга оҕолору кытта үлэҕэ оҥорон таһаарбыт методикаларын, төрөппүттэри кытта ыкса ситимнээх үлэлэрин үтүө түмүктэрэ буолар.
Ытыктабыллаах Надежда Ивановна, Вера Михайловна, Александр Гаврильевич!
Эһигинэн киэн туттан туран истиҥник эҕэрдэлиибит уонна туйгун доруобуйаны, айымньылаах үлэни, дьолу, бары үтүөнү баҕарабыт!
“Нам улууһа” МО пресс-сулууспата
