Бүгүн, алтынньы 13 күнүгэр, улуус дьаһалтатын уонна тэрилтэ салайааччылара П.П.Ядрихинскай – Бэдьээлэ аатынан Олоҥхо дьиэтигэр алгыс сиэригэр – туомугар кыттыыны ыллылар.

Сиэри – туому Нам улууһун «Айыы» дьиэтин салайааччыта, Олоҥхо ассоциациятын тутаах үлэһитэ – Светлана Михайловна Лукина иилээн ыытта.

“Түмсүүнү төрүттээччи, тэрээһини олохтооччу, далааһыннаах өйдөөх, эҥсиилээх санаалаах, өрөгөй талааннаах, санныгар саргылаах, түөһүгэр төлкөлөөх” диэн хотой уобараһын арыйар алгыс тыллара этилиннилэр.

Улуус баһылыгын э.т. Анатолий Павлов, улуус депутаттарын Сэбиэтин бэрэссэдээтэлэ Алексей Винокуров алтынньы 17 күнүгэр М.К. Аммосов аатынан культура уонна духуобунай сайдыы дыбарыаһыгар анал байыаннай дьайыыга кытта сылдьар биир дойдулаахтарбытыгар аналлаах «Биир санаанан – биир сомоҕо» көмө акцияҕа тэрилтэлэр, улуус олохтоохторо кыайыы туһугар санааны түмэн, түмсэн бары кыттыыны ылалларыгар ыҥырдылар.

Анал байыаннай дьайыы кыттыылааҕа, «Саха сирэ – геройдар сирдэрэ” программанан улуус дьаһалтатыгар стажировка бара сылдьар Захар Анисимов байыаннай дьайыы буола турар сиригэр гуманитарнай көмө олус наадатын эттэ, бары биир санаанан салайтаран кыайыы туһугар туруулаһыахха диэн ыҥырда. Улуустааҕы үөрэх управлениетын салайааччыта Мария Игнатьева улуус тэрилтэлэрэ тэрээһиниттэн тутулуга суох бары акцияҕа кытталларыгар ыҥырда.

Убаастабыллаах улууспут олохтоохторо, айанньыттар!

Хаар чараас, түһэ илик буолан тыа дьонугар кэлии-барыы, айан-сырыы, тиэйии-таһыы үлэтэ элбиир. Суолга – иискэ, чараас мууска сэрэхтээх буоларгытыгар ыҥырабыт!  Муус халыҥа 15 см. ордук буоллаҕына биирдэ туоруурга куттал суох буоларын санатабыт!

“Нам улууһа” МО пресс – сулууспата