Алтынньы 18 күнүгэр Никольскай нэһилиэгэр Е.И.Бубякина аатынан “Күндүл” норуот айымньытын дьиэтигэр Ийэ күнүн бэлиэтиир “Күн күбэй ийэлэр” тэрээһин ыытылынна.
Бырааһынньыктааҕы тэрээһини Никольскай нэһилиэгин Аҕа баһылыга Уйгу Сайаан Айхан уола истиҥ эҕэрдэ тылынан арыйда. Нэһилиэк түөлбэлэрин салайааччыларыгар – ыал ийэлэригэр, нэһилиэк сайдарын туһугар күүс-көмө буолан көхтөөх үлэни ыыталларын иһин махтанан туран сибэкки дьөрбөтүн туттарда. Ол кэннэ Аҕа баһылыкпыт ийэлэргэ анаан бэйэтэ айбыт ырыатын бэлэх уунна. Салгыы “Күн күбэй ийэлэр” хамаанданан куонкурус ыытылынна. Манна биэстии киһилээх 3 хамаанда ийэлэрэ: Никольскайтан 2 хамаанда уонна Маймаҕаттан биир хамаанда күөн көрүстүлэр. Куонкурус ийэлэри бииргэ түмэр, сэргэхситэр, доҕордоһуу тыынын күүһүрдэр аналлаах ыытыллынна.
Ол курдук, ийэлэр 5 түһүмэхтээх күрэххэ кытыннылар: Визитка, викторина, флешмоб, оонньуу, муода көрдөрүүтэ.
Муода түһүмэҕэр – сахалыы таҥас, деловой, спортивнай көстүүм, гэтсби уонна киэһээҥҥи таҥас көрүҥнэрэ киирдилэр.
Ийэлэр көхтөөх кыттыылара күрэх таһымын үрдэттэ, көрөөччүлэр биһирэбиллэрин ылыан ылла. Олус кэрэхсэбиллээх, долгутуулаах күрэхтэһии буолан ааста.
Түмүккэ, бастакы үрдэли “Күн сардаҥалара” хамаандата (Никольскай), иккис үрдэли “Биэс бэһиэлэй кыргыттар” хамаандата (Маймаҕа) уонна үһүс үрдэли “Ыйдаҥа” хамаандата (Никольскай) ыланнар кыайыы өрөгөйүн биллилэр!
Күрэххэ кыттыбыт ийэлэрбитигэр барҕа махтал тылларын тиэрдэбит! Тэрээһини Е.И.Бубякина аатынан “Күндүл” НАДЬ үлэһиттэрэ тэрийэн, иилээн – саҕалаан ыыттылар.
Улууспут бары Күн күбэй ийэлэригэр Никольскай нэһилиэк дьаһалтатын, олохтоохторун аатыттан итии – истиҥ эҕэрдэбитин ыытабыт уонна үтүө доруобуйаны, үлэҕитигэр, үөрэххитигэр ситиһиилэри, элбэх үөрүүнү, дьолу баҕарабыт!
Уйгу Сардаана Тургун Кыыһа
