Алтынньы 20 күнүгэр бэнидиэнньиктээҕи планерка мунньаҕы улуус баһылыга Юрий Слепцов салайан ыытта.
- Алтынньы 17 күнүгэр Ийэ дойдубут интэриэһин көмүскээһиҥҥэ ытык иэстэрин толоро сылдьар биир дойдулаахтарбытыгар анаан ыытыллыбыт көмө акция түмүгүнэн 4 913 550,79 солкуобай харчы киирбит.
- Сэтинньигэ улуустан 4 киһилээх бөлөх байыаннай дьайыы буола турар сир тирэх пууннарыгар биир дойдулаахтарбытын көрсө, көмө, баһыылка тиэрдэ айанныыра былааннанар.
- 2025 сылтан СӨ тыатын хаһаайыстыбатын министиэристибэтэ үбүлээһин механизмнарыгар уларытыылары киллэрэн, улуустар боломуочуйаларын кэҥэтэн, үбү – харчыны бэйэлэрэ ставкалаан, ханнык хайысхаҕа былаан быһыытынан угалларыгар кыах биэрбитэ. Ол чэрчитинэн улуус дьаһалтата “Малые сельскохозяйственные объекты” диэн программанан сүөһү турар хотонун тутууга куонкурус биллэрбитэ. Кыайыылаахтар биллэн, бу күн туругунан үбүлээһин 100% толору төлөнөн, 1-кы Хомустаах, Фрунзе уонна Аппааны бааһынай хаһаайыстыбаларыгар хотоннор тутуулара салҕанар.
- Анал байыаннай дьайыы кыттыылаахтарын уонна дьиэ кэргэннэрин, чугас дьоннорун кытта үлэни утумнаахтык ыытар сыаллаах улуус дьаһалтатыгар специалист ананан үлэтин саҕалаата. Специалиһынан улуустааҕы «Воин» түмсүү чилиэнэ Владислав Васильев ананна.
- Бу дьыл ахсынньытыгар киэн туттар, убаастыыр биир дойдулаахпыт, 90-с сылларга Саха Өрөспүүбүлүкэтэ төрүттэниитигэр үлэлэспит, СӨ судаарыстыбаннай Суверенитетын, Арассыыйа, өрөспүүбүлүкэ Төрүт Сокуонун оҥорсубут, Өрөспүүбүлүкэҕэ Ил Түмэни тэрийсибит Егор Михайлович Ларионов 85 сааһын туолар үбүлүөйдээх тэрээһинин үрдүк таһымҥа ыытар анал хамыыһыйа үлэлиир.
- Сэтинньи ыйга урбаанньыттарга аналлаах улуустааҕы форум ыытыллара былааннанар.
- Хас нэһилиэк аайы общественнай Сэбиэттэри тэрийии уонна былааннаах үлэни ыыталларын ситиһии соруга турар.
- «Якутлесресурс» Намнааҕы салаатын хонтуоратын таһыгар хас да массыына турар саҥа гараж үлэҕэ киириэҕэ.
- Улуу баһылыга Юрий Слепцов улуус тэрилтэлэрин, дьаһалта отделларын уонна управлениелар салайааччыларыгар соруктары туруорда.
“Нам улууһа” МО пресс – сулууспата
