Алтынньы 17 күнүгэр улуус баһылыга Юрий Слепцов салайааччылаах үбүлүөйдээх тэрээһини ыытарга улуустааҕы хамыыһыйа мунньаҕа ыытылынна. Юрий Иннокентьевич Илья Винокуров саха норуотугар сүҥкэн оруоллааҕын, тугунан да кэмнэммэт кылааттааҕын бэлиэтээн туран, республика таһымнаах үбүлүөйдээх тэрээһиннэри ыытар уонна тэрийэр хамыыһыйаны тэрийэргэ тустаах салайааччыларга сурук ыыталаан үлэни күүһүрдэргэ эттэ.
Үлэ былаанын Хатыҥ Арыы нэһилиэгин баһылыга Иван Ноговицын билиһиннэрэн кэпсээтэ. Үбүлүөйдээх сылы арыйыыттан саҕалаан сылы быһа ыытыллар тэрээһиннэр тула ырытыстылар, кэпсэттилэр.
Улуус баһылыга Юрий Слепцов Илья Егорович ситэ үөрэтиллибэтэх, сырдатыллыбатах үлэтин эйгэлэрин хасыһан, чинчийэн-үөрэтэн, архыыптары кытта былааннаах үлэни ыытарга сорудахтаата. Кини туһунан уһуллубут, оҥоһуллубут видеолары, киинэлэри киэҥ эйгэҕэ сырдатыыга улахан болҕомто ууруллуохтааҕын санатта. Илья Винокуров үбүлүөйдээх сылынан тутуу, тыа хаһаайыстыбатын, доруобуйа харыстабылын о.д.а. эйгэҕэ араас программаларга кыттан көхтөөх үлэни ыытыахтаахпытын эттэ.
