Егор Михайлович Ларионов 1920-1930 сыллардаахха автономия былааһын көмүскээбит, Саха сиригэр маҥнайгы государственноһы тэрийбит, сувереннай Республика кэскилин туһунан дириҥник ырааҕы толкуйдаабыт саха интеллигенциятын лидердэрэ Максим Кирович Аммосов, Платон Алексеевич Ойуунускай, Исидор Никифорович Барахов үлэлэрин салҕааччы, туруулаһааччы быһыытынан, Республика суверенитетын харыстыырга Төрүт Сокуону оҥорууга олуктары уурбут дьоннортон биирдэстэрэ буолар.

Егор Михайлович Республика социальнай-экономическай сайдыытын тирээн турар соруктарын регион, Россия, аан дойду таһымнарыгар итэҕэтиилээхтик көмүскээбитэ.

Егор Михайлович Ларионов киэн туттар биир дойдулаахпыт, уһулуччулаах государственнай уонна политическай деятель Максим Кирович Аммосов аатын үйэтитиигэ элбэх сыратын уурбута. Ол курдук, М. К. Аммосов төрөөбүтэ 100 сыллаах юбилейыгар Республика юбилейнай комиссиятын председателин солбуйааччы быһыытынан Хатырыкка ыһыахтар тэрээһиннэригэр, М.К. Аммосов мемориальнай таас дьиэтин оҥорууга, Максим Аммосов төрөөбүт нэһилиэгин сайдыытыгар, нэһилиэнньэ олоҕо тупсарыгар, гаас киириитигэр, суол оҥоһуутугар үлэлэри ыыппыта.

Дьокуускай куораттан Намҥа диэри 45 км усталаах асфальт суол оҥоһуллубута. Хатырыкка таас музей дьиэ тутулларын ситиспитэ. Хатырыкка М.К. Аммосов аатынан икки мэндиэмэннээх таас оскуола арыллыбыта. Улуу дьоммут М.К. Аммосов уонна П.А. Ойуунускай доҕордоһууларын кэрэһилээн, Нам уонна Таатта оройуоннарын икки ардыларыгар “Доҕордоһуу” далаһата олохтоммута. Е.М. Ларионов көҕүлээһининэн «Аммосов ааҕыылара» сыллата ыытыллар үгэскэ кубулуйдулар. М.К. Аммосов аатын үйэтитиигэ 1997 сылтан СР бастакы Президенэ Михаил Ефимович Николаев ыйааҕынан Максим Кирович Аммосов аатынан Саха Республикатын Государственноһын бириэмийэтэ олохтоммута.

Салгыыта бэчээттэниэҕэ

“Нам улууһа” МО пресс-сулууспата