Сэтинньи 24 күнүгэр, бэнидиэнньиктээҕи планерка мунньаҕы улуус баһылыга Юрий Слепцов салайан ыытта.

Т.К. Ядрихинская аатынан Намнааҕы социальнай-геронтологическай киин салайааччыта Инна Сивцева аҕам саастаахтарга аналлаах «Көхтөөх уһун үйэлэнии» бырайыак чэрчитинэн «Күннүк» диэн ааттаах саастаах дьоҥҥо аналлаах уһуйаан туһунан иһитиннэрии оҥордо. Бастакы сезоҥҥа аҕам саастаах дьон сарсыарда 9:00 чаастан күнүс 12:00 чааска диэри, онтон 16:00 чааска диэри сылдьыбыттар. Уопсайа икки нэдиэлэ – 10 үлэ күнүгэр сылдьаллар. Бөлөххө 10 киһи сылдьар. Туох да улахан хааччах суох, ол эрэн дьахтар 55 уонна эр киһи 60-тан үөһэ саастаах дьон буолуохтаахтар. Маныаха сылдьыан баҕарар дьон улуустааҕы социальнай харалта управлениетыгар баран сайаапка түһэрэллэр диэн кэпсээтэ. «Күннүк» үлэтин 2026 сылтан салгыыра былааннанар.

Намнааҕы Киин балыыһа кылаабынай бырааһа Ариан Сергеев иһитиннэрбитинэн, ааспыт нэдиэлэҕэ 110 киһи суһал көмөҕө наадыйбыт, мантан 38 оҕо.

Грипп утары вакцинацияны ылыы улахан дьоҥҥо – 96% , оҕолорго – 99% тэҥнэспит.

Намнааҕы киин поликлиника тиис быраастара сэтинньи 24-28 күннэригэр Таастаах нэһилиэгэр үлэлиэхтэрэ, олохтоохтор тиистэрин эмтиэхтэрэ.

Роспотребнадзор Намнааҕы салаатын салайааччыта Марфа Игнатьева иһитиннэрбитинэн, ааспыт нэдиэлэҕэ 3 – сэбиргэхтэтии, (внебольничная пневмония), 18 “А” группа грипп ыарыынан ыалдьыы түбэлтэтэ бэлиэтэммит.

Сыстыганнаах ыарыы элбээбитинэн, (грипп, ОРВИ) общественнай миэстэлэргэ, медицина уонна социальнай тэрилтэлэргэ, общественнай транспортка харыстанар маасканы кэтии режимэ киирэрин иһитиннэрдэ.

2026 сыл ыам ыйын 1 күнүгэр диэри улуус бары нэһилиэктэригэр общественнай түмсүүлэр форумнара ыытыллара былааннанар.

Улуустааҕы үөрэх управлениетын начальнига Мария Игнатьева иһитиннэрбитинэн, сэтинньи 25-26 күннэригэр Дьокуускай куоракка саха тылын, литературатын уонна култууратын учууталларын үһүс сийиэһигэр улуус делегацията кыттыыны ылыаҕа.

Ахсынньы 8 күнүгэр улуус урбаанньыттарын форума ыытыллыаҕа.

“Нам улууһа” МО пресс-сулууспата