Бу күн Намнааҕы дьиэ кэргэн уонна ыччат социальнай-психологическай өйөбүлүн киинин педагог-психолога Анна Васильева өр сылларга үтүө суобастаах үлэтин, Саха Республикатыгар психологическай сулууспа сайдыытыгар уонна бигэ туруктаныытыгар дьоһуннаах кылаатын иһин «Саха Республикатын психологическай сулууспатын туйгуна» түөскэ кэтиллэр бэлиэнэн наҕараадаланна.
Анна Сергеевна кииҥҥэ 2011 сыллаахтан үлэлиир-хамныыр. Бастакы үлэлиир сылларыгар сокуоннай саастарын ситэ илик оҕолор дьыалаларыгар уонна кинилэр бырааптарын көмүскээһиҥҥэ былааннаах үлэ ыытара. Араас улуустааҕы, республикатааҕы мунньахтарга, төгүрүк остуолларга, семинардарга кыттан, ыччат чөл олохтоох буоларыгар болҕомто уурара.
2012 сыллаахтан сааскы халаан уутун кэмигэр нэһилиэнньэҕэ информационнай-психологическай өйөбүл оҥоруутугар үлэлэһэр. Бөлөҕүнэн уонна биирдиилээн психологическай көмө оҥоһуллуутугар сүҥкэн кылааттаах. Социальнай хайысхалаах тэрилтэлэри кытта бииргэ үлэлээн нэһилиэктэргэ сылдьан психологическай көмө бэрээдэгин оҥороллор.
Анал байыаннай дьайыы саҕаланыаҕыттан улууска психологтар бөлөхтөрүн салайааччытынан үлэлиир. 2023 сыллаахха балаҕан ыйын 27 күнүттэн алтынньы 31 күнүгэр диэри Ростов-на-Дону куоракка байыаннай клиническэй госпиталга волонтер-психолог быһыытынан үлэлээбитэ. Ити сылтан ыла «Кылаабынай муниципальнай психолог» бырайыагы көҕүлээн үлэлэтэр.
Анна Сергеевнаҕа сыралаах үлэтэ үтүө түмүктээх буолбутунан истиҥ эҕэрдэбитин тиэрдэбит! Нэһилиэнньэ чөл туруктаах, чэгиэн буолуутугар кыһаллан үлэлиир идэҕэр ситиһиилэри, бастыҥ көрдөрүүлэри баҕарабыт. Тус олоххор чэгиэн доруобуйаны, дьолу-соргуну!
