Саха тылын, литературатын уонна култууратын учууталларын үһүс өрөспүүбүлүкэтээҕи сийиэһэ сэтинньи 25-26 күннэригэр ыытыллар.
Сийиэскэ өрөспүүбүлүкэ улуустарыттан, Дьокуускай куораттан 458 кэриҥэ дэлэгээт, ону таһынан дойду араас эрэгийиэннэриттэн ыалдьыттар, тыл эспиэрдэрэ кыттыыны ылаллар. Ол курдук, «Төрөөбүт тыл уонна төрөөбүт литература бастыҥ учуутала – 2024» Бүтүн Арассыыйатааҕы күрэхтэһии кыайыылааҕа Бурят Өрөспүүбүлүкэтиттэн Улан Удэтээҕи национальнай лиссиэй-интэринээт учуутала Светлана Раданжапова, Калмыкия Өрөспүүбүлүкэтиттэн «Төрөөбүт тыл уонна төрөөбүт литература бастыҥ учуутала – 2024» Бүтүн Арассыыйатааҕы күрэх призера, Элиста куорат 24 №-дээх уһуйаанын эбии үөрэхтээһинин педагога Екатерина Балакаева ыалдьыттыыллар.
Сийиэс дэлэгээттэрэ саха тылын, литературатын уонна култууратын үүнэр көлүөнэбитигэр, кэлэр кэскилбитигэр тиэрдэр, сайыннарар туһугар этиилэри киллэриэхтэрэ.
Сүрүн көтөҕүллэр боппуруостарынан буолуохтара: сахалыы иитии-үөрэтии билимин сайыннарыы, сахалыы тылынан иитэр-үөрэтэр усулуобуйаны үөрэх эйгэтигэр тэрийии, идэҕэ бэлэмниир үөрэх тэрилтэлэригэр саха тылын, литературатын уонна култууратын үөрэтэр усулуобуйаны тэрийии, тупсарыы, Олоҥхо педагогиката, аныгы ыалга оҕону сахалыы иитии, доруобуйаларыгар хааччахтаах оҕолорго төрөөбүт тылы үөрэтии уратыта, сахалыы үөрэтии хаачыстыбатын кэтээн көрүү, үрдэтии; куорат эйгэтигэр саха тылын үөрэтии кыһалҕатын уонна инникитин туһунан, саха тылын, литературатын, кэпсэтии тылын олимпиадатын туһунан, онтон да атын тыын боппуруостарга төгүрүк остуоллар, санаа атастаһыылар, иһитиннэриилэр ыытыллаллар, быыстапкалар тэриллэллэр.
Дэлэгээттэр уонна сийиэс тэрийээччилэрэ «Саха» көрдөрөр-иһитиннэрэр хампаанньа былаһааккаларыгар кыттыыны ылыахтара.
Сийиэс сүрүн мунньаҕа бүгүн, сэтинньи 25 күнүгэр, П.А. Ойуунускай аатынан Саха академическэй тыйаатырыгар буолуоҕа. Мунньах бырагыраамата киэҥ. «Сахам тыла үүнэ-сайда турдун!» диэн саха тылын уонна литературатын учебниктарын, көмө босуобуйалар, оҕоҕо аналлаах сахалыы кинигэлэр, методическай литературалар быыстапкалара тэриллиэҕэ. «Саха Өрөспүүбүлүкэтигэр судаарыстыбаннай уонна дьиҥ таһымнаах тыллары харыстааһын уонна сайыннарыы» диэн өрөспүүбүлүкэтээҕи судаарыстыбаннай бырагыраама чэрчитинэн, анал бырайыактары сырдатыы буолуоҕа. Туспа бырагырааманнан Олоҥхо дэкээдэтин тэрээһиннэрэ ыытыллыахтара.
С.Н. Донской-II аатынан Үөрэҕи сайыннарар уонна идэни үрдэтэр институкка «Учуутал мастарыскыайа» диэн бастыҥ учууталлар, иитээччилэр маастар-кылаастара ыытыллыахтара. Дэлэгээттэргэ анаан тэрийээччилэр умсугутуулаах бырагырааманы оҥордулар. Ол курдук, сүрүн үлэни таһынан култуурунай сынньалаҥ тэрээһиннэрэ (түмэлгэ, сахалыы киинэҕэ, испиэктээххэ сылдьыы) киллэрилиннилэр.
С.Н. Донской-II аатынан Үөрэҕи сайыннарар уонна идэни үрдэтэр үнүстүүт үлэһиттэрэ идэ таһымын үрдэтэр куурустары ыытыахтара. Сийиэс бырагырааматын куйаар ситиминэн Саха тылын, литературатын уонна култууратын учууталларын III өрөспүүбүлүкэтээҕи сийиэһин сигэтигэр билсиэххэ сөп: https://съездучителей14.рф/
