Бу күн ийэлэр олох араас хайысхаларыгар кыһалҕаларын аһаҕастык этиннилэр, этиилэри киллэрдилэр. Ол курдук, кинилэр Көбөкөҥҥө оскуола, Нам сэлиэнньэтигэр Ийэ скверин тутууларын, чааһынай дьиэҕэ толору хааччыллыыны киллэриини, 4 уонна 8 оҕолоох ийэлэргэ “Материнская слава” уордьан тоҕо анамматын, Маймаҕа нэһилиэгэр ийэлэргэ уонна комсомол путевкатынан совхозка үлэлээбит дьон тустарынан кинигэлэри үбүлээһиҥҥэ көмөнү, атын нэһилиэккэ сүөһүлэрин көрдөрө биэрбит аҕам саастаах дьоҥҥо субсидия харчытын көрүүнү, үүт харчыта кэмигэр кэлиитин туруорустулар. Ону сэргэ анал байыаннай дьайыы кыттыылаахтарын олохторун-дьаһахтарын чэпчэтиигэ – сураҕа суох сүппүт буойуттарга уһаайба бэриллиитин, көмөнү анааһыҥна баар ситэ быһаарыллыбатах боппуруостары – чуолкайдыырга көрдөстүлэр, СВО хаһан бүтэрин ыйыталастылар.

Улуус баһылыга киирбит ыйытыыларга сиһилии хоруйдаата, баар кыһалҕалары быһаарыыга бэйэтин көрүүлэрин эттэ. Юрий Слепцов Нам сэлиэнньэтигэр 19 элбэх кыбартыыралаах дьиэ кыбаарталын тутуу, бастыҥ дьиэ кэргэттэргэ муниципальнай бириэмийэни олохтооһун курдук үлэлэр кэлэр сылларга ыытыллыахтаахтарын иһитиннэрдэ.

Ийэлэр маннык истиҥ көрсүһүү тэриллибитигэр, анал байыаннай дьайыыга сылдьар буойуттарбытыгар гуманитарнай көмө тиэрдиллибитигэр барҕа махталларын тиэртилэр.

Салгыы төгүрүк остуол тэрилиннэ. Тэрээһини улуус баһылыгын солбуйааччы Егор Протопопов иилээн-саҕалаан ыытта.

Улуустааҕы нэһилиэнньэ социальнай харысхаллаах буолуутун управлениетын салайааччы Людмила Петрова дьиэ кэргэни өйүүр программалары, ийэ хапытаалын туһаныыны, “Үйэ оҕолоро” сертификат ананыытын, герой-ийэлэргэ туох чэпчэтии баарын кэпсээтэ.

РФ Намнааҕы клиентскэй сулууспатын салайааччыта Евгений Бурцев пенсионнай законодательствоҕа туох уларыйыылар баалларын иһитиннэрдэ. Ол кэнниттэн көрсүһүү кыттыылаахтарын ыйытыыларыгар хоруйдааһын тэрилиннэ. Ийэлэр накопительнай пенсия төлөнүүтүн, ылыы бэрээдэгин, кырдьаҕас киһини көрүүгэ ыстаас ааҕыллыытын тустарынан, о.д.а. ыйытыылары биэрдилэр.

“Нам улууһа” МО пресс-сулууспата