Ахсынньы 1 күнүнээҕи планерканы улуус баһылыга Юрий Слепцов салайан ыытта.
Планерка саҕаланыытыгар юрист күнүн көрсө юрист идэлээх дьону эҕэрдэлээн туран, Юрий Иннокентьевич быраап боппуруостарыгар уонна коррупцияны утары салалта салайааччытыгар Галина Охлопковаҕа Махтал туттарда.
Роспотребнадзор Намнааҕы салаатын салайааччыта Марфа Игнатьева иһитиннэрбитинэн, 2 киһи сэбиргэхтэтиинэн, 2 ковидынан, 4 А грибинэн ыалдьыбыттар. ОРВИ ааспыт нэдиэлэтээҕэр аҕыйаабыт, онон санитарнай-эпидемиологическай хамыыһыйа культурнай-маассабай тэрээһин ыытылларын-ыытыллабытын быһаарыахтара. Улууска прививочнай кампания түмүктэннэ, былаан 100% туолла.
Улуустааҕы киин балыыһа кылаабынай бырааһын солбуйааччы Вера Атласова иһитиннэрбитинэн, профкөрүүлэр 100% туолан тураллар. Үлэлиир сиргэ миэстэтигэр диспансеризацияны ааһыы 78,6% туолан турар. Уопсайа 62 тэрилтэ дуогабар түһэрсибитэ. ФЛГ-га түһүү 68,8% туолла.
Юрий Иннокентьевич тэрилтэ салайааччыларыгар ФЛГ-га түһүүнү, диспансеризацияны ааһыыны уонна ГТО-ну туттарыыны булгуччулаах оҥорорго, бириэмийэлэри аныырга ити пууннары хайаан да киллэрэргэ сорудахтаата.
Бу нэдиэлэҕэ ыксаллаах быһыыны-майгыны сэрэтэр, туоратар уонна куттал суох буолуутун хааччыйар хамыыһыйа мунньаҕа буолуоҕа. Мунньахха бу сыллааҕы халаан, туох итэҕэстэр-быһаҕастар баалларын, тугу туоратыахха наадатын туһунан уонна кэлэр сылга үлэ былаанын торуомнуохтара уонна кэпсэтиэхтэрэ.
Улуус дьаһалтатын дьыалаларын дьаһайааччы Петр Сергучев салайааччылаах делегация анал байыаннай дьайыы буола турар сиригэр биир дойдулаахтарбытын көрсөн, гуманитарнай көмө тиэрдэн кэллилэр. Петр Петрович бу айан уратылаах буолбутун, байыастарбыт элбэх буолбакка 3-5-тии буолан тахсан көрсүбүттэрин туһунан кэпсээтэ. Уопсайа 73 уолу көрсүбүттэр. Уолаттар төһө да сылайдаллар, инникигэ эрэллээхтэрин уонна төрөөбүт улуустарын дьонугар-сэргэтигэр муҥура суох махталларын тиэрпиттэрин туһунан эттэ.
