Бөтүҥнээҕи “Сардаана” оҕо саада тэриллибитэ 60 сылын  көрсө уһуйааҥҥа араас тэрээһиннэр ыытыллаллар.  Ол курдук, сэтинньи 24 күнүгэр юбилейдаах  нэдиэлэ  үөрүүлээхтик аһылынна. 

Сэтинньи 25 күнүгэр ветеран үлэһиттэри, оҕолору, коллективы  кытта көрсүһүү буолан ааста. Өр сыл үтүө суобастаахтык үлэлээбит ветераннарбыт: Лукина Н.В., Боброс В.П., Грязнухина И.В. ахтыы оҥорбуттарын оҕолор сэргээн, болҕойон иһиттилэр. Иитиллээччилэрбит  эҕэрдэлээн ыллаатылар, үҥкүүлээтилэр, олоҥхолоотулар уонна бэйэлэрэ илиилэринэн оҥорбут бэлэхтэрин туттардылар. Бүтэһигэр итии чэйдээх остуол тула олорон уруккуну-хойуккуну санаһан истиҥ кэпсэтии таҕыста.

Сэтинньи 26 күнүгэр выпусниктарбытын кытта көрсүһүү ыытылынна. Ыҥырыыбытын ылынан педагог идэтин талан үөрэҕирии салаатыгар айа-тута, үлэлии сылдьар выпусниктарбыт: Уваровская О.А., Лобанова А.А., Скрябина Л.С., Иванова С.В. кэлэн ыалдьыттаатылар. Детсад устун экскурсия тэрилиннэ.

Оҕолор эҕэрдэ ырыаларын, үҥкүүлэрин бэлэхтээтилэр. Көрдөөх сорудахтардаах оонньууларга кыттан уһуйааҥҥа сылдьыбыт кэмнэрин санаан оҕо буолан ыллылар. “Оҕолорго оонньуурда бэлэхтээ” акцияҕа кытыннылар. Улуустааҕы “Эҥсиэли” хаһыакка “Айар үлэ умсулҕаныгар” ыстатыйа таҕыста.

Юбилейнай нэдиэлэ чэрчитинэн ветераннар уонна үлэһиттэр күүстэринэн выставкалар тэрилиннилэр. Ол курдук, “Оҕо сааһым оонньуурдара” туруорууга урукку кэмнээҕи оонньуурдар, “Коллекция уонна талант түһүлгэтигэр” урукку кэми кэрэһэлиир значоктар, маркалар, кэмпиэт суулара,  ону таһынан араас омук харчылара, манньыаттара, чуораан арааһа уо.д.а.

Сэтинньи 28 күнүгэр олохтоох “Айылгы” культурнай сынньанар кииҥҥэ  юбилейнай нэдиэлэбитин түмүктүүр  тэрээһин  буолла.

“Сардаана” оҕо саада