Егор Михайлович Ларионов юрист быһыытынан государственнай таһымнаах өйдөөх-санаалаах, республикаҕа тарбахха баттанар дьоммутуттан биирдэстэрэ, айылҕаттан айдарыылаах юрист, саҥа тутул олохтонуутун утумнааччы талааннаах политик, бөдөҥ тэрийээччи, общественнай-политическай деятель.
Күүстээх юрист быһыытынан Российскай Федерация уонна Саха Республикатын Конституциятын ырытыһан оҥорууга, суверенитет уонна федеральнай сыһыаннаһыылар торумнаныыларыгар үлэлэспит улахан үтүөлээх.
Саха республикатын бастакы Президенэ М.Е. Николаев бэйэтин тула үлэҕэ дьоҕурдаах, киэҥ билиилээх, эрэллээх көмөлөһөөччүлэри түмэрэ уонна норуот кэскилин туһугар айымньылаахтык, бэйэҕит күүскүтүн барытын биэрэн үлэлээҥ диэн ирдэбил туруорара.
1990 сыллаахха балаҕан ыйын 27 күнүгэр Саха АССР Үрдүкү Сэбиэтин Председателэ М.Е. Николаев Төрүт Сокуон оҥоһуутугар уурааҕынан комиссия састаабыгар Нам оройуонуттан Егор Михайлович Ларионов киирбитэ. Саха Республикатын Төрүт Сокуона – Конституция – 1992 сыллаахха муус устар 22 күнүгэр бигэргэммитэ. Төрүт сокуоннаах, икки палаталаах Парламент баар буолбута.
Республикабыт бастакы Президенинэн М.Е. Николаев талыллыбыта. Суверенитет ылыллыаҕыттан Саха сирэ Россия иһигэр туспа государство буолбута. Төрүт Сокуон Саха сирэ сайдарыгар, бөҕөргүүрүгэр, көмүскэллээх буолуутугар, сиртэн хостонор баайын сөпкө туһанарыгар, норуоту, республика гражданнарын, быраап өттүнэн көмүскээбитэ. Государственнай үөрэх тэрилтэлэригэр үөрэнии, доруобуйаны көрдөрүү, эмтэнии босхо буолбута. Аҕыйах ахсааннаах норуоттары араҥаччылаабыта. Саха Республиката Конституцияҕа тирэҕирэн аан дойдутааҕы сибээскэ тахсыбыта. Омук сирдэригэр СР представительстволара тэрилиннилэр, атыы-эргиэн сайынна. Республика норуоттара эйэлээхтик, бигэ туруктаахтык олороллор.
Егор Михайлович мындыр толкуйунан, күүстээх санаатынан, модун дьулуурунан саҥа Саха сиригэр государственность букатын атын, демократическай тутула үөскээбитэ, экономика, государственнай политика атын акылаакка ууруллубута, Саха сирин бары норуота саҥа кэскиллээх суолга үктэммитэ.
«Нам улууһа” МО пресс-сулууспата
