И.Е. Винокуров аатынан Хатыҥ Арыытааҕы история уонна кыраайы үөрэтэр музей директора Михаил Нестеров эһиил биир дойдулаахпыт, уһулуччулаах государственнай уонна политическай деятель Илья Егорович Винокуров төрөөбүтэ 130 сылыгар аналлаах тэрээһиннэргэ нэһилиэктэр бары көхтөөхтүк кытталларыгар ыҥырда. Нэһилиэктэргэ, улууска кэлэр-барар делегациялары, оскуола оҕолорун, олохтоохторун музейга сырытыннаралларыгар эттэ.
Юрий Иннокентьевич улуу киһибит үбүлүөйдээх сылыгар тохсунньу 1 күнүгэр төрөөбүт күнүгэр сибэкки ууруутуттан саҕалаан былааннаах үлэни ыытарга сорудахтаата. Хас биирдии нэһилиэккэ анал хамыыһыйа тэриллэн үлэ торумнаан ыытарыгар эттэ.
Муниципальнай баайы-дуолу бас билии комитетын управлениетын директорын солбуйааччы Алексей Аммосов социальнай гаастааһын тосхоло туолуутун туһунан иһитиннэрии оҥордо.
Улуустааҕы культура уонна духуобунай сайдыы салалтатын кулууптарынан үлэҕэ специалиһа Сахаяна Орлова улууска баар культурнай нэһилиэстибэ объектарын олохтоох дьаһалталар бэйэлэрин бас билиилэригэр ыларга үлэлһиэхтэрин наадатын эттэ. Пааматынньыктар, стелалар тутулуннахтарына тутатына биир реестргэ түмэн иһиэххэ наадатын ыйда.
Улуус баһылыга Юрий Слепцов ытык сирдэрбитин харыстааһыҥҥа күүстээхтик болҕомто ууран үлэлэһэргэ эттэ. Маныаха нэһилиэктэргэ муниципальнай баайы-дуолу бас билии комитетын управлениетын уонна культура үлэһиттэр үрдүттэн олорон бииргэ үлэлиэхтээхтэрин тоһоҕолоото.
