Хамаҕатта нэһилиэгэр улуус ветераннарын сэбиэтин (председатель Софья Кобякова) көҕүлээһининэн «Түһүлгэ» норуот айымньытын киинигэр Биллибэт саллаат күнүгэр аналлаах тэрээһин ыытылынна. Хамаҕатта дьоно-сэргэтэ, ытык ветераннар, үөрэнээччилэр ааттара биллибэт саллааттары ахтан-санаан аастылар.
Аҕа дойду сэриитигэр Нам улууһуттан 1424 киһи уоту кытта уот, сири кытта сир буолан сураҕа суох сүппүттэрэ. Улуустааҕы ветеран сэбиэтин көҕүлээһининэн ааспыт үйэ улахан кыргыһыытын кэпсиир-ипсиир үгүс бырайыактар оҥоһуллунулар. Хорсун геройдарга сүгүрүйэр уонна махтанар тэрээһиннэр ыытыллаллар.
Бу күн нэһилиэктэртэн сураҕа суох сүппүт саллааттар сыдьааннара – ытык аҕам саастаах дьоммут истиҥ ахтыы оҥордулар. Олохх нэһилиэк оскуолаларын үөрэнээччилэрэ тэрээһини үкҥүүнэн-ырыанан киэргэттилэр.
Улуу Кыайыы 80 сылын көрсө «Колхуостаах хоодуоттар», «Ааллаах Үүн таһаҕасчыттара», «Биир дьиэ кэргэнтэн Ийэ дойду көмүскэлигэр» кинигэлэр быйыл күн сирин көрдүлэр. Көрдөөһүн үлэ түмүгүнэн 58 саллаат бойобуой суола көһүннэ. Бу үлэҕэ оскуолалар, нэһилиэктэр күүскэ ылсан үлэлииллэр.
Бу курдук, сэрии толоонугар геройдуу охсуспут, биһиги көлүөнэ көҥүл олоҕун турууласпыт үтүө дьоммутун ахтан-санаан ааһар, кинилэри кэриэстиир – биһиги ытык иэспит.
