Ахсынньы 1 күнүгэр Ийэ декадатын чэрчитинэн «Истиҥ иэйии ситимэ» диэн улуустааҕы куонкурус А.Ф. Шестаков аат. улуустааҕы норуот айымньытын дьиэтин үрдүк сыанатыгар үһүс төгүлүн ыытылынна.
Бу бырайыак автора – Мариянна Данилова. Мариянна Михайловна Бөтүҥ нэһилиэгин С.П. Оконешников аатынан «Айылгы» культурнай кииҥҥэ уус-уран салайааччынан үлэлиир кэмигэр, бу куонкуруһу бастакытын 2022 сыллаахха улуустааҕы Үрүҥ тунах ыһыахха ыыппыта. Манна Үөдэй нэһилиэгиттэн Вера Данилова кыыһа Эрикалыын кыайыылаах үрдүк аатын ылбыттара. Онтон 2024 сыллаахха Бөтүҥ нэһилиэгэр ыытыллыбыта. Манна Хамаҕаттаттан Розалия Новгородова кыыһа Сандааралыын кыайыы өрөгөйүн билбиттэрэ. Онон күрэспит быйыл үһүс төгүлүн ыытылынна.
Быйылгы куонкуруһу улуус дьахталларын сэбиэтин председателэ Ирина Винокурова, улуус дьаһалтатын дьиэ кэргэн уонна ыччат поитикатын отдела, Бөтүҥ олохтоох модельнай библиотекатын сэбиэдиссэйэ, Саха Республикатын культуратын туйгуна Валентина Колесова тэрийдилэр.
Дьүүллүүр сүбэҕэ П.П. Ядрихинскай – Бэдьээлэ аат. Олоҥхо дьиэтин директора, «Сайдам ыал» куонкурус автора Вера Колпашникова, «Россия ийэлэрэ» общественнай хамсааһын Нам улууһугар председателэ, улуустааҕы оҕо модельнай библиотекатын сүрүннүүр библиотекара Татьяна Михайлова, «Истиҥ иэйии ситимэ» бырайыак автора, фотограф Мариянна Данилова үлэлээтилэр.
Куонкуруска улууспут биэс нэһилиэгиттэн: ХатыҥАрыыттан Елеонора Николаева кыыһа Сардааналыын, Көбөкөнтөн Аида Ноговицына кыыһа Аиколуун, Хамаҕаттаттан Кыыдаана Попова кыыһа Айыллааналыын, Салбаҥтан Вероника Данилова кыыһа Доминикалыын, Бөтүҥтэн Алена Бочкарева кыыһа Күннэй Куолуун кыттыыны ыллылар.
Куонкурус биэс түһүмэҕинэн барда. Бастакы түһүмэххэ дьиэ кэргэттэрбит бэйэлэрин билиһиннэрдилэр, иккис түһүмэххэ талааннарын көрдөрдүлэр, үһүс түһүмэххэ ийэ кыыһынаан бэйэ-бэйэлэрин төһө үчүгэйдик билэллэрин тургутар ыйытыыларга хоруйдаатылар, төрдүс түһһүмэххэ дьиэҕэ оҥорбут оҥоһуктарын дьүүллүүр сүбэ, көрөөччүлэр иннилэригэр көмүскээтилэр уонна бүтэһик «Саха буолан сандаарыах, киһи буолан килбэйиэх» диэн ааттаммыт түһүмэххэ сахалыы таҥастарынан дефиле хаамтылар.
Кыттааччылар бары да олус кыһаллан, оҥостон кэлбиттэр, хас биирдии дьиэ кэргэн олус талааннааҕын, илиилэригэр дьоҕурдааҕын астына-дуоһуйа көрдүбүт.
Дьүүллүүр сүбэ түмүгүнэн Хатыҥ Арыыттан Елеонора Николаева кыыһа Сардааналыын «Сылаас сыһыан ситимэ» номинация, Хамаҕаттаттан Кыыдаана Попова кыыһа Айыллааналыын «Кэрэ ситимэ» номинация хаһаайыттарынан буоллулар, үһүс үрдэлгэ Бөтүҥтэн Алена Бочкарева кыыһа Күннэй Куолуун таҕыстылар, иккис үрдэли Салбаҥтан Вероника Данилова кыыһа Доминикалыын ыллылар, «Истиҥ иэйии ситимэ» улуустааҕы күрэс кыайыылаахтарынан Көбөкөнтөн Аида Ноговицына кыыһа Аиколуун буолан кыайыы өрөгөйүн биллилэр.
Тэрийээччилэр ааттарыттан куонкуруска кыттыбыт бары дьиэ кэргэттэргэ, кыттыбыт нэһилиэктэр дьахталларын сэбиэтигэр, бириистэри туруорбут «Нам улууһа» муниципальнай оройуон дьиэ кэргэн уонна ыччат политикатын отделыгар – салайааччы Екатерина Евстафьеваҕа уонна «Бөтүҥ нэһилиэгэ» МТ баһылыгар Константин Поповка барҕа махталбытын тиэрдэбит.
