Нам улууһун баһылыгын бастакы солбуйааччы Анатолий Павлов, улуустааҕы биир кэлим сакаасчыт сулууспатын директора Алексей Кондаков уонна капитальнай тутуу отделын салайааччыта Александра Маркова үлэһиттэрин кытта хайдах быһыылаахтык үлэлии-хамныы, бырайыагы, сметаны оҥоро олороллорун о.д.а. туһунан сиһилии кэпсээтилэр.
Максим Витальевич уопут атастаһан баран санаатын маннык үллэстэр: Биһиги улууспутугар кэлэр 2026 сылтан биир кэлим сакаасчыт сулууспатын тэрийиэхпитин баҕарабыт. Онуоха СР тутуу министерствотыттан саҕалаан, республикаҕа тутуунан дьарыктанар улахан тэрилтэлэрэ бу өттүгэр холобур быһыытынан Нам улууһа сөпкө дьаһанан үлэлии олорор диэн мэктиэлээбиттэрэ. Онон, сырыыбытын киин улуустан Намтан саҕалаатыбыт. Өссө илин эҥэргэ Мэҥэ Хаҥаласка барар былааннаахпыт. Алексей Алексеевичтыын эрдэ билсэр, кэпсэтэр этибит. Онон, тутууга эппиэтинэстээх үлэһиттэрбин барыларын илдьэ кэллим.
Сүрүннээн докумуон өттүгэр консультацияластыбыт. Улуус дьаһалтата бу сулууспаҕа хайдах боломуочуйа биэрэн олорорун, хайдах састааптаах үлэлиирин-хамсыырын билистибит. Элбэҕи биллибит, ол курдук, холобура, сулууспа иһигэр бэйэтэ бырайыактыыр отделлаах эбит. Капитальнай тутуу отдела туспа гынан баран, күүскэ бииргэ үлэлии олороллорун сэҥээрэ көрдүбүт.
Онон, 2026 сылтан структура оҥорорбутугар итинник бырайыактыыр отделы тэрийэн, хас да сыл үлэлии олорор сулууспа практикатын илэ харахпытынан көрөн, уопут атастаһан, инникитин үлэлиирбитигэр судургу, төһүү күүс буолуоҕа диэн эрэнэбит.
