Ахсынньы 2-3 күннэригэр Дьокуускай куоракка СР библиотечнай эйгэтин үлэһиттэрин бастакы съезтэрэ ыытылынна. Манна библиотечнай дьыала сайдыытын, төрөөбүт тылбытын харыстааһын уонна ааҕыыга интэриэс үрдэтии туһунан кэпсэттилэр.
Саха сирин улуустарыттан уопсайа 234 делегат кыттыыны ылла. Нам улууһуттан муниципальнай уонна оскуола библиотекаларыттан 12 делегат кытынна. Съезд үөрүүлээх арыллыыта Ю.А. Гагарин аатынан культура уонна аныгы искусство киинигэр буолла.
«Государственные и муниципальные библиотеки РС(Я) в эпоху цифровой трансформации» диэн төгүрүк остуолга Намнааҕы кииннэммит библиотечнай ситим директора Майя Софронова иһитиннэрии оҥордо. Культура үлэһиттэригэр социальнай өйөбүл биир кэлим миэрэлэрин туһунан кэпсээтэ.
Бу күн библиотечнай ситим бастыҥ үлэһиттэрин бочуоттаах дипломнарынан уонна махтал суруктарынан наҕараадалаатылар. Бастакы Хомустаах «Эйгэ» саҥа көлүөнэ библиотекатын сэбиэдиссэйэ Надежда Жиркова «Гражданскай килбиэн» бочуоттаах бэлиэнэн наҕараадаланна. Ону сэргэ Бөтүҥ библиотекатын сэбиэдиссэйэ Валентина Колесова Ил Түмэн председателин Махталынан бэлиэтэннэ.
Съезд түмүгүнэн чопчу сүбэлэр оҥоһулуннулар, чуолаан төрөөбүт тылынан оҕо уонна ыччат литературатын элбэтии, тыа сирин библиотекаларын түргэн интернеккэ холботуу, республика ыраах улуустарыгар сибээс сыанатын түһэрии уонна оҕо төрөөбүт тылынан ааҕарын туһугар онно сөптөөх тэрээһиннэри элбэтии. Делегаттар Саха сирин библиотекардарын съеһин үс сылга биирдэ тэрийэргэ диэн быһаардылар.
