Тэрээһини Нам улууһун үөрэх үлэһиттэрин идэлээх сойууһун уонна Нам улууһун үөрэх үлэһиттэрин эдэр ыччатын совета иилээн-саҕалаан ыыттылар.

Эҕэрдэ тылларын анаатылар: улуус баһылыгын социальнай боппуруоска солбуйааччыта Егор Андреевич Протопопов, үөрэх салалтатын начальнигын солбуйааччыта Егор Иннокентьевич Бочонин, Нам улууһун үөрэх үлэһиттэрин идэлээх сойууһун председателэ Надежда Еремеевна Васильева.

Уопсайа 70-тан тахса эдэр ыччат кэлэн кыттыыны ылла. Хамаандаҕа арааран тэттик оонньууну И.С. Гаврильев аатынан Нам 1нүөмэрдээх орто оскуолатын педагог-психолога Габышева Нарыйа Гаврильевна ыытта.

Салгыы воркшоп саҕаланна. Воркшоп бастакы чааһыгар «Проектное управление» үөрэҕи ХИФУ ИРППО директора Курнева Майя Васильевна ыытта.

Бырайыак көмүскээһинигэр элбэх саҥа этии киирдэ. Ол курдук, «Улусный лагерь молодежи им.М.К. Аммосова», аҕам саастаах көлүөнэ кыһалҕаларын быһаарыыга, о.д.а интэриэһинэй саҥа хайысхалары көрүүлэри кэпсээтилэр.

Тэрээһин кыттыылаахтара Майя Васильевна ыытар форматын олус интэриэһиргээтилэр, сэргээтилэр, көхтөөхтүк кытыннылар. Эдэр үлэһиттэр киирбит этиилэри үлэлэригэр туһаныахтара диэн бигэ эрэллээхпит.

Воркшоп иккис чааһыгар хамаанданан музыкальнай лотоҕа күрэхтэстилэр. Эмиэ аныгылыы сэргэх оонньуу буолла. Маннык лотону коллективка ыытыахха сөп эбит диэн санаа кэллэ. Көрсүһүүнү эдэр үөрэх үлэһиттэрэ Нам 2 нүөмэрдээх орто оскуолатын алын сүһүөх учуутала Намина Ньургустановна Жиркова ырыатынан түмүктээтилэр.

Бу күн Хамаҕатта оскуолата күөстүү оргуйда. Эдэр ыччат үмүөрүһэ мустан, үөрэнэн, сынньанан, бэйэ-бэйэлэрин кытта санаа үллэстэн, элбэх информацияны ылан аныгыскыга өссө маннык көрсүһүүлэр буолалларыгар баҕардылар.

Надежда Васильева, улуус үөрэҕин үлэһиттэрин идэлээх сойууһун председателэ