Бүгүҥҥү, ахсынньы 8 күнүнээҕи, планерканы улуус баһылыга Юрий Слепцов салайан ыытта.
Роспотребнадзор Намнааҕы салаатын кылаабынай специалист-эксперэ Александра Попова иһитиннэрбитинэн, 7 сыстыганнаах ыарыы бэлиэтэммит. Түбэ нэһилиэгэр биир кылаас карантиҥҥа олорор.
Улуустааҕы киин балыыһа кылаабынай бырааһа Ариан Сергеев иһитиннэрбитинэн, 2 киһи уулуссаҕа үлүйэн өлүүлэрэ бэлиэтэммит. Маныаха Юрий Иннокентьевич кыһыммыт тымныыта биллэ тымныйбытынан сэрэтии-өйдөтүү үлэтин күүһүрдэргэ эттэ.
Быраап боппуруостарыгар уонна коррупцияны утары салалта салайааччыта Галина Охлопкова ахсынньы 9 күнүгэр Коррупцияны утары охсуһуу күнүнэн биллэрин уонна онуоха туһаайан хас биирдии тэрилтэ бэйэтэ былааннаах үлэни, тэрээһини тэрийэн ыытыахтааҕын санатта.
«Намкоммунтеплоэнерго» АО генеральнай директора Николай Игнатьев тэрилтэлэргэ, чааһынай дьиэлэргэ туох эмит саахал таҕыстаҕына бастаан тэрилтэ АДС нүөмэригэр – 41-4-05. 8-924-662-66-91 эбэтэр ЕДДС нүөмэригэр – 42-5-08 эрийэн биллиэриэхтээхтэрин тоһоҕолоон эттэ. Тэрилтэлэр дьуһуурустубаларын үлэлэрин күүһүрдэллэригэр санатта.
Улуустааҕы социальнай харалта салалтатын салайааччыта Людмила Петрова социальнай контракт квоталара толору туһаныллыбыттарын туһунан иһитиннэрдэ.
Улуустааҕы үөрэх салалтатын салайааччыта Мария Игнатьева халлаан тымныйан сорох нэһилиэктэргэ дистанционнай үөрэх саҕаламмытын туһунан эттэ. Ааспыт нэдиэлэҕэ Замятинскай ааҕыылар үрдүк таһымҥа ыытыллыбыт, бу нэдиэлэҕэ Ларионовскай ааҕыылар буолуоҕа. Ил Дархан харыйата ахсынньы 19-20 күннэригэр, оттон улуус баһылыгын харыйата ахсынньы 19 күнүгэр ыытыллыаҕа.
Бизнес-киин салайааччыта Борис Бугаев иһитиннэрбитинэн, ахсынньы 15 күнүгэр урбаанньыттар Форумнара ыытыллар. Бу күн куораттан спикердэр тахсан семинар ыытыахтара. Сүрүннээн нолуок реформатын тула кэпсэтиэхтэрэ. Ону таһынан куоракка олорор Нам улууһуттан төрүттээх урбаанньыттар тахсан бэйэлэрин уопуттарын кэпсиэхтэрэ. Бу күн эбиэт кэнниттэн сыллата ыытыллар Саҥа дьыллааҕы дьаарбаҥка тэриллиэҕэ.
Улуустааҕы экономическай сайдыы салалтатын салайааччыта Олег Николаев ааспыт нэдиэлэҕэ Красноярскай кыраайга баран кэлбит командировкатын туһунан кэпсээтэ. Консультациялыыр-ресурснай киин хайдах үлэлиирин, бырайыактары хайдах оҥороллорун, ситиһэллэрин, олоххо киллэрэллэрин туһунан билсэн, илэ көрөн кэлбиттэр. Итини барытын сурукка түһэрэн, бырайыак оҥорон үлэлэһиэхпит диэн эттэ.
Юрий Иннокентьевич тымныынан сибээстээн хас биирдии тэрилтэ дьуһуурустубатын үлэтин хонтуруолга ылыахтааҕын, ыытыллар тэрээһиннэр суолталаах буолуохтаахтарын санатан эттэ.
Ахсынньы 9 күнүгэр Россияҕа Герой күнэ бэлиэтэнэр. Онон, сарсын, ахсынньы 9 күнүгэр, И.Е. Винокуров аатынан Намнааҕы педагогическай колледж аактабай саалатыгар күнүс 14:00 чаастан Герой күнүгэр аналлаах тэрээһин буолуоҕа.
Ахсынньы 10-12 күннэригэр Дьокуускай куоракка «Малая Родина – сила России» III Бүтүн Россиятааҕы муниципальнай форум регионнааҕы күннэрэ ыытыллыахтаах. Ити тэрээһин чэрчитинэн ахсынньы 10 күнүгэр форум кыттыылаахтара Нам улууһугар тахсан Саха сирин дьоно-сэргэтэ хайдах дьаһанан олороллорун, үлэлииллэрин-хамсыылларын билсиэхтээхтэр.
