Бүгүҥҥү, ахсынньы 15 күнүнээҕи, планерканы улуус баһылыга Юрий Слепцов салайан ыытта.
Өр сыллаах үтүө суобастаах үлэтин уонна Нам улууһугар тутуу сайдыытын эйгэтигэр кылаатын иһин «Нам улууһа» МО сайдыытыгар кылаатын иһин» бочуоттаах бэлиэнэн СР тутуу комплексын ветерана, Саха сирин бочуоттаах тутааччыта, СР бастакы тутааччыта, Ленскэй нэһилиэк бочуоттаах гражданина Борис Бочуров наҕараадаланна.
Улуустааҕы инбэлииттэр обществоларын салайааччыта Марина Литвинова иһитиннэрбитинэн, ахсынньы 15-26 күннэригэр доруобуйаларынан хааччахтаах дьон декадалара ыытыллар. Декада чэрчитинэн ахсынньы 25 күнүгэр улуустааҕы библиотека уораҕайыгар тэрилтэ салайааччыларын кытары көрсүһүү ыытыллара былааннанарын эттэ. Ону таһынан, үлэбит таһаарыылаахтык барарыгар адаптивнай спорка тренер наадатын, эдэр саастаах доруобуйаларынан хааччахтаах дьоҥҥо былааннаах үлэ ыытыллыахтааҕын туһаайан эттэ.
Улуустааҕы спорт управлениетын салайааччыта Павел Иванов иһитиннэрбитинэн, Уус Алдан Бороҕонугар ыытыллыбыт 2025 сыллааҕы хапсаҕай федерациятын Кубогын түмүк хапсыһыытыгар Нам улууһун хамаандата Мэҥэ Хаҥалас улууһун бөҕөстөрүн 9х8 ахсаанынан хотон улууспутугар улахан кыайыы кэлбитин бэлиэтээн эттэ. Дьокуускай куоракка волейбол федерациятын Кубога буолан ааста. Нам улууһун хамаандата Кыргызстан республикатын хамаандатын кэнниттэн 2-ис бочуоттаах миэстэни ылары ситистэ. Ону таһынан, гиирэ федерациятын Кубогар уопсайа 11 хамаандаттан Нам улууһа бастаан, кыайыы өрөгөйүн биллэ. Түгэнинэн туһанан, Павел Иванов улуус дьаһалтатыгар, чуолаан улуус баһылыгар Юрий Слепцовка, тэрилтэ салайааччыларыгар махталын биллэрдэ.
Улуустааҕы культура уонна духуобунай сайдыы управлениетын салайааччы Семен Ядрихинскай ааспыт нэдиэлэҕэ улууспутугар элбэх тэрээһиннэр ыытыллыбыттарын, быйыл ытыктыыр убаастыыр киһибит, олоҥхоһут, этээччи Дмитрий Кривошапкин 85 сыллаах үбүлүөйүнэн былааннаах үлэ барбытын, Дмитрий Иванович олоҥхото ахсынньы 14 күнүгэр А. Кулаковскай аатынан культура дьиэтигэр үрдүк таһымҥа көрдөрүллүбүтүн эттэ. Айан боппуруостарын быһаарыыга кыттыспыт тэрилтэ салайааччыларыгар махтанна.
Улуустааҕы үөрэх салалтатын салайааччыта Мария Игнатьева халлаан тымныйан бүгүн улуус үрдүнэн 1-8 кылаас оҕолоругар дистанционнай үөрэх ыытылларын, Ларионовскай ааҕыылар эмиэ онлайн ыытылларын, ааспыт нэдиэлэҕэ тэрээһиннэр былаан быһыытынан барбыттарын кэпсээтэ. Бу нэдиэлэҕэ Ил Дархан харыйата ахсынньы 19-20 күннэригэр, улуус баһылыгын харыйата ахсынньы 19 күнүгэр ыытыллыахтара.
Улуус баһылыга Юрий Слепцов хас биирдии хайысхаҕа кыайыы өрөгөйө кэлэрэ биир санаанан түмсэн үлэ барарыттан улахан суолталааҕын бэлиэтээн эттэ уонна махталын биллэрдэ.
Сарсын, ахсынньы 16 күнүгэр, 15:00 чаастан Дыбарыаска ытыктыыр, убаастыыр биир дойдулаахпыт Егор Михайлович Ларионов үбүлүөйдээх сылынан үөрүүлээх мунньахха көхтөөх кыттыыны ылалларыгар тэрилтэ салайааччыларыгар туһаайан эттэ.
” Нам улууһа” МО пресс-сулууспата
