Мунньахха кэлэр сыллааҕы бюджет тула кэпсэтии ыытылынна. Сүрүн иһитиннэриини финансовай управление салайааччыта Александра Тихонова оҥордо. Бэлиэтээн этэр буоллахха, хамнас быйыл 13% улаатта, нэһилиэктэр дотацияларын тыырар методикаҕа быйыл коммунальнай өҥө ааҕыллааһыныгар уларыйыы киирдэ. Бу хаалбыт кэмҥэ нэһилиэктэр баһылыктара бюджет туолуутун хонтуруолга ылалларыгар сыал-сорук турда.

Тутуу отделын специалиһа Альбина Сысолятина хаарбах дьиэттэн дьону көһөрүү программа үһүс түһүмэҕин чэрчитинэн иһитиннэрии оҥордо. Нэһилиэктэр баһылыктарыгар докумуоннар кэмигэр баралларын тус хонтуруолга ылалларыгар эттэ.

Нам улууһун дьаһалтатын ыксаллаах быһыыны-майгыны туоратыыга уонна гражданскай оборонаҕа сүрүннүүр специалиһа Николай Монастырев баһаартан сэрэхтээх буолуу месячнигын чэрчитинэн ыытыллар үлэлэр бу ый 25 күнүгэр түмүктэниэхтээхтэр диэн иһитиннэрдэ.

Нэһилиэнньэ 100% инструктаһынан хабыллыахтаах диэн улуус баһылыга Юрий Слепцов нэһилиэк баһылыктарын сорудахтаата.

Улуус мунньаҕын депутаттарын Сэбиэтин бэрэсэдээтэлэ Алексей Винокуров сарсын, ахсынньы 16 күнүгэр, 15:00 чаастан М.К. Аммосов аатынан култуура уонна духуобунай сайдыы дыбарыаһыгар ытыктыыр, убаастыыр биир дойдулаахпыт Егор Михайлович Ларионов үбүлүөйдээх сылынан үөрүүлээх мунньахха нэһилиэк баһылыктара көхтөөх кыттыыны ылалларыгар ыҥырда.

“Нам улууһа” МО пресс-сулууспата