Бүгүн, ахсынньы 18 күнүгэр, Эҥсиэли хочотун килбэйэр киинигэр –  Ленскэй нэһилиэккэ үөрүүлээх күн буолла.

Ол курдук, дьон олорор усулуобуйатын тупсарарга туһаайыллыбыт «Хаарбах уонна саахалланар туруктаах дьиэттэн дьону көһөрүү» программанан саҥа таас, толору хааччыллыылаах, 3 этээстээх, 12 квартиралаах дьиэ үөрүүлээх арыыллыыта буолла. Максим Аммосов аатынан уулуссаҕа уопсайа 595,8  кв.м иэннээх, саҥа таас дьиэни  урбаанньыт Владислав Иннокеньевич Соловьев салайар тэрилтэтэ үтүө суобастаахтык тутан үлэҕэ киллэрдэ.

Сахалыы сиэринэн, саҥа дьиэ арыллыытын айхаллаан алгысчыт Петр Охлопков – Алгыстаах Бүөтүр уот оттон үрдүк айыылартан көрдөстө.

Аалай лиэнтэни улуус баһылыгын солбуйааччы Егор Андреевич Протопопов, Ленскэй нэһилиэк баһылыгын солбуйааччы Тимофей Егорович Охлопков, урбаанньыт Владислав Иннокеньевич Соловьев быстылар.

Улуус баһылыгын солбуйааччы Егор Протопопов, Ленскэй нэһилиэк баһылыгын солбуйааччы Тимофей Охлопков уонна Модут нэһилиэгин баһылыга Ефим Гоголев эҕэрдэ тылларын тиэртилэр. Тутуу үлэтигэр докумуонуттан саҕалаан үлэҕэ киириэр диэри үлэлэспит дьоҥҥо махтал суруктары туттардылар.

Ону сэргэ хаһаайыттарга: Модут нэһилиэгин 4 олохтооҕор, Салбаҥ нэһилиэгин 2 уонна Ленскэй нэһилиэк 4 олохтооҕор үөрүүлээх быһыыга-майгыга күлүүстэрин туттардылар. Тыл этээччилэр уонна саҥа дьиэ хаһаайыттара РФ Президенигэр Владимир Путиҥҥа, Ил Дархан Айсен Николаевка, Нам улууһун баһылыгар Юрий Слепцовка уонна урбаанньыт Владислав Соловьевка, тэрилтэтин үлэһиттэригэр улахан махталларын тиэртилэр.

Биир дойдулаахтарбытыгар Саҥа дьылы көрсө саҥа дьиэҕэ киирбиттэринэн истиҥ эҕэрдэбитин тиэрдэбит, дьоллоох-соргулаах олоҕу, кытаанах доруобуйаны баҕарабыт!

«Нам улууһа» МО пресс-сулууспата