Сылбыт түмүктэнэрэ бу кэллэ. Саргылаах Саҥа дьыл, Ороһооспо бырааһынньыктара, уһун өрөбүллэр чугаһааттан – чугаһаан иһэллэр.  Кэтэһиилээх кэрэ кэми көрсө дьон-сэргэ күөх харыйаны, дьиэлэрин симииллэр, киэргэтэллэр.

Ол эрээри сыыһа туттууттан, сэрэҕэ суох буолууттан күлүмүрдүүр уоттарбыт алдьархайга тиэрдэр кутталлаахтарын умнуо суохтаахпыт! Бырааһынньыктар, сынньалаҥ күннэр үөрүү – көтүү аргыстаах, этэҥҥэ ааһалларын туһугар уоттан, дэҥтэн – оһолтон сэрэхтээх буолуу ирдэбиллэрин, быраабылалары кытаанахтык тутуһуохтаахпыт, болҕомтолоох буолуохтаахпыт!

Маргарита Федорова, СӨ ыксаллаах быһыы – майгы министиэристибэтин Нам оройуонун надзордуур отделениетын салайааччыта, Ис дьыала майора:

• Саҥа дьыл бырааһынньыктарын кэмигэр дьон -сэргэ элбэхтик пиротехниканы, уоту-күөһү туттар.  Бу барыта уот туруутугар тоҕооһу үөскэтэр, куттал улаатар. Дьон халлаан тымныйан оһохторун оттоллор, эбии ититэр тэриллэри холбоноллоро элбиир.
• Уоту холбуур аптамаат алдьанан, розетка итийэн умайан тахсар түгэннэрэ тахсаллар. Бу барыта көрүүгэ – истиигэ, хонтуруолга сылдьыахтаах.
• Фейерверк ытарга кэккэ быраабыланы тутуһуллуохтаах.
• Пиротехника хайаан да сертификааттаах, анал маҕаһыынтан атыылаһыллыбыт буолуохтаах.
• Атыылаһарга тас коробката бүтүнүн, сиигирбэтэҕин бэрэбиэркэлиниллиэхтээх
• Коробкаҕа оҥорбут тэрилтэ аадырыһа, төлөпүөнүн нүөмэрэ сурулла сылдьыахтаах.
• Инструкциятын толору ааҕан туттуллуохтаах.
• Куттала суох сиргэ диэн ыйыллыбыт буолар, дьиэттэн, дьонтон төһө тэйиччи сиргэ ууран ытыллыахтааҕа.
• Маны таһынан салют, фейерверк ытар сир чугаһыгар уот линията, мастар суох буолуохтаахтар. 30 м радиуска туох да суох буолара ирдэнэр.
• Күүстээх тыалга ыппат ордук.
• Манна уматар киһи улахан эппиэтинэстээх.
• Ытар салютун коробкатын сиргэ тирэхтээх гына уурара ирдэнэр, илиигэ эҥин тута сылдьан уматыллыбат.
• Аны ытан бүттэххэ коробканы 5 мүнүүтэ иһигэр тыытыллыбат.
• Көрөр дьон 15 м тэйиччи туруохтаах. Манна, уопсайынан, пиротехниканы сөбүлээн ытар дьон бэйэлэрэ улахан эппиэтинэһи сүгэллэрин умнуо суохтаахтар.
• Гирлянданы, лаампалаах уокка холбонор киэргэллэри эмиэ сертификааттаахтары эрэ атыылаһарга дьулуһуҥ.
• Гирлянданы дьиэттэн тахсан бараргытыгар, түүн утуйаргытыгар араара сылдьыҥ. Харыйа дьиэ эркинигэр (истиэнэҕэ) уонна үрүтүгэр, итийэр тэриллэргэ сыстан туруо суохтаах  – 1 м тэйиччи туруохтаах.
• Уоттан сэрэхтээх буолууну хааччыйар сыалтан дьиэ иһигэр туттуллар АДПИ – ны (автономный дымовой пожарный извещатель) холбоноргутугар сүбэлиибит.

Уот күөдьүйэр түгэнигэр тута мобильнай телефонунан 101 (стационартан 01), эбэтэр 112 нүөмэргэ эрийэн тута биллэриҥ, аадырыһы этиҥ.

“Нам улууһа” МО пресс – сулууспата