Бэҕэһээ, ахсынньы 18 күнүгэр, томороон тымныыны аахсыбакка, Орто Халыма улууһун бэрэстэбиитэллэрэ, дуогабар быһыытынан атыыга, хортуоппуй уонна оҕуруот аһын тиэнэн бардылар.
Ол курдук, Александр Семенович Жирков бааһынай хаһаайыстыбатын (Хамаҕатта) уонна Ньургун Феофанович Гуляев салайааччылаах “Эрэл” тыа хаһаайыстыбатын производственнай кооперативын оҕуруот аһын харайар-хаһаанар эбийиэктэриттэн 16 тн хортуоппуйу, 2 тн хаппыыстаны, 2 тн моркуобу уонна 1тн сүбүөкүлэни икки КАМАЗ массыынаҕа (тепляк) тиэнэннэр, саҥа дьыл иннинэ Орто Халыма улууһун олохтоохторугар тириэрдэрдии суоппардар айаннаатылар.
Орто Халыма улууһун баһылыга Иван Васильевич Лаптев уонна тыа хаһаайыстыбатын управлениетын начальнига Дмитрий Николаевич Винокуров бэйэлэрэ кэлэн, Нам улууһун баһылыгын солбуйааччы Филипп Васильевич Николаевы уонна тыа хаһаайыстыбатын управлениетын начальнига Владимир Иванович Макаровы кытта көрсөн кэпсэттилэр. Эһиил, 2026 сылга табаарынай уонна сиэмэ хортуоппуйун атыылаһааһыҥҥа сөбүлэҥ түһэристилэр.
Санатар буоллахха, Иван Васильевич алтынньы ыйга Нам улууһун баһылыга Юрий Иннокентьевич Слепцову кытта көрсөн сибиэһэй оҕуруот аһын олохтоох бааһынай хаһаайыстыбалартан атыылаһар туһунан боппуруоһу кэпсэппиттэрэ, сүбэлэһэн былааннаабыттара.
Орто Халыма улууһун баһылыга Иван Васильевич Лаптев.
“Нам улууһа” МО пресс – сулууспата
