Ахсынньы 18 күнүгэр, Нам улууһун баһылыга Юрий Слепцов улуус дьаһалтатын дьиэтин актовай саалатыгар Ил Дархан харыйатыгар ыҥырыллыбыт оҕолору кытта көрүстэ.
Көрсүһүүгэ Нам улууһун үөрэҕин управлениетын начальнигын солбуйааччы Егор Бочонин, управление иитэр уонна эбии үөрэхтээһин салаатын специалистара, делегация салайааччылара кыттыыны ыллылар.
Улуус баһылыга Юрий Слепцов эҕэрдэ тылыгар Нам улууһуттан араас таһымнаах олимпиадаларга, научнай-практическай кэмпириэнсийэлэргэ, спортивнай күрэхтэһиилэргэ, общественнай үлэҕэ үрдүк ситиһиилэнэн, үөрэххэ дьаныардарын көрдөрөн 20 үөрэнээччи сыл бастыҥ тэрээһинигэр кыттар чиэскэ тиксибитин, СӨ Ил Дарханын истипиэндьийэтин лауреаттарынан буолбуттарын бэлиэтээн эттэ.
Юрий Слепцов:
“Нам улууһа өркөн өйдөөх, Сахабыт сирин историческай кэрдиис кэмнэригэр Республикабыт сайдыытын түстээбит уһулуччулаах государственнай уонна политическай диэйэтэллэри иитэн таһаарбыт Аан улууһунан биллэр. Ол курдук, биһиги Максим Кирович Аммосовынан, Илья Егорович Винокуровынан, Ньургун Семенович Тимофеевынан, Егор Михайлович Ларионовынан, Алексей Ильич Еремеевынан киэн туттабыт. Онуоха эһиги, бастыҥтан бастыҥ айар-тутар баҕалаах, дьоҕурдаах оҕолорбут, чулуу дьоммут дьыалаларын салгыахтара диэн бигэ эрэллээхпит”.
Салгыы баһылык оҕолору кытта аһаҕас кэпсэтиитэ тэрилиннэ. Оҕолор улуус историятын тула, Ил Дарханы кытта ханнык көрсүһүү ордук улахан оруолу ылбытын, баһылык үлэтин сүрүн ис хоһоонун, ханнык хаачыстыбалары ирдиирин, тус олоҕун, Салбаҥҥа экзамен тутар пуун тэриллиитин, Намҥа саҥа оскуола тутуута хаһан бүтэрин интэриэһиргээн ыйыттылар, санаа атастастылар. Онуоха Юрий Иннокентьевич олоҕуттан, үлэтиттэн тус холобурдаан кэпсээн оҕолор олус астыннылар. Дьоҥҥо киһилии сыһыаннаһыы, кырдьаҕас дьону убаастааһын, эдэрдэргэ өйөбүл буолуу курдук кини үлэтигэр тутуһар сүрүн өрүттэрэ уонна салайааччыга улахан наҕараада дьон убаастабылын ылыы буолалларын бэлиэтээн эттэ. Бу күн көрсүһүү дириҥ ис хоһоонноохтук, улууспут инникитин түстүүр аналлаах олус истиҥник барда.
Саамай кэтэһиилээх Ил Дархан харыйата ахсынньы 19-20 күннэригэр Дьокуускайга ыытыллыаҕа. Үгэс быһыытынан өрөспүүбүлүкэ аҕа баһылыга Айсен Николаев лауреаттарга СӨ Ил Дарханын истипиэндьийэтин дипломнарын туттарыаҕа, 10 бастыҥ стипендиат үөрэнээччи ааттаныаҕа. Маастар-кылаастарга, культурнай тэрээһиннэргэ сылдьан оҕолор элбэҕи билиэхтэрэ-көрүөхтэрэ. Көхтөөх кыттыыны, ситиһиини баҕарабыт!
«Нам улууһа” МО пресс-сулууспата
