Ахсынньы 19 күнүгэр Нам улууһун дьаһалтатын 2025 сыллааҕы үлэтин отчуота Граф Биэрэгэр ыытылынна. Мунньаҕы нэһилиэк баһылыга Иван Ноговицын иилээн-саҕалаан ыытта. Отчуоттуур бөлөҕү улуус баһылыга Юрий Слепцов салайар. Мустубут дьон видеонан отчуоту сэргээн иһиттилэр. Мунньахха уопсайа 15 киһи кытынна.
Салгыы улуус баһылыга Юрий Слепцов салалталаах бөлөх састаабыгар кэлбит тэрилтэ салайааччылара ааспыт сыллааҕы улуус баһылыгын отчуотугар боротокуолга киирбит этиилэр туолууларын иһитиннэрдилэр.
Граф Биэрэгин олохтоохторо Намҥа АБЗ кэтэҕэр баар учаастактарга хаһан гаас ситимэ тардылларын, Граф Биэрэгэ иниккитэ хайдах буолуо сөбүн, 2026 сыл улууспутугар туох сылынан биллэриллэн эрэрин туоһуластылар. Намнааҕы техникум саҥа үөрэнэр корпуһун дьиэтин тутуутун, оскуола өрөмүөнүн, бэйдиэ сылдьар ыттары кытта үлэлэһэр урбаанньыт Василий Крымков үлэтин-хамнаһын өйөөһүнү, дэриэбинэ иһигэр сылдьар сылгылары нэһилиэнньэлээх пуун территориятын таһыгар таһаарыы үлэтин, эдэр учууталларга уопсай дьиэ тутуутун, «Самородок» сынньалаҥ киинэ олус тымныытын этэн туран, капитальнай өрөмүөнү күүскэ туруорустулар.
Мунньах кыттыылаахтара улуус баһылыга Ю.И. Слепцов уонна кини хамаандата күүскэ үлэлииллэрин бэлиэтээтилэр уонна сыллааҕы отчуоту 100% биһирииллэрин биллэрдилэр.
Түмүккэ улуус баһылыга Юрий Слепцов дьон-сэргэ аһаҕастык санааларын этиммиттэригэр, үлэни биһирээбиттэригэр махталын тиэртэ, кэлэр сылга өссө таһаарыылаах үлэни, ситиһиини баҕарда.
«Нам улууһа» МО пресс-сулууспата
