Ахсынньы 19 күнүгэр улуус дьаһалтатын 2025 сыллааҕы үлэтин отчуоттуур мунньаҕа Иккис Хомустаах нэһилиэгэр ыытылынна. Отчуоттуур бөлөҕү улуус баһылыгын бастакы солбуйааччы Анатолий Павлов салайар. Мунньахха уопсайа 47 киһи кытынна.
Үлэ отчуота видеонан көрдөрүлүннэ. Ол кэннэ Анатолий Павлов былырыыҥҥы отчуоттуур мунньахха киирбит этиилэр туолууларын билиһиннэрдэ.
Бу күн Иккис Хомустаахтар интернат тутуутун түргэтэтиини, саҥа культура дьиэтин тутууну, бырааһы олохсутууну, социальнай такси сырыытын олохтооһуну, сир боппуруоһун чуолкайдааһыны, үөһээ бөһүөлэк ититиитин ситимин быһаарыыны, ыксаллаах быһыыга-майгыга нэһилиэнньэни таһар баржаны, тыа хаһаайыстыбатын үлэтин сырдатыыны, үүт харчыта кэмигэр кэлиитин, үүт тутар пууну үлэлэтиини туруорустулар.
Мунньах кыттыылаахтара улуус дьаһалтата ыытар үлэтин «биһириибит» диэн сыанабылы биир санаанан биэрдилэр.
Нам улууһугар тутуу үлэтэ тэтимнээхтик ыытылларын, сайдыы барарын бэлиэтээн эттилэр.
Отчуоттуур бөлөх салайааччыта Анатолий Павлов бары кыттыбыт дьоҥҥо махталын тиэртэ, саҥа үүммүт сылга ситиһиилэри баҕарда.
«Нам улууһа» МО пресс-сулууспата
