Ахсынньы 19 күнүгэр, улуус баһылыгын солбуйааччы Филипп Николаев салайар 3-с бөлөҕө «Нам улууһа» МТ 2025 сылга ыыппыт үлэтин отчуотун Фрунзе нэһилиэгиттэн саҕалаата. Үгэскэ кубулуйбутунан, ыытыллыбыт үлэ видеонан сырдатылынна.
Ол кэнниттэн олохтоохтор 2024 с. отчуокка киирбит туруорсууларынан барбыт үлэни ырыттылар. Ол курдук сибээс, интернет боппуруоһа бу да сырыыга сытыытык турда. Хаарбах уонна саахалланар туруктаах дьиэттэн дьону көһөрүү прогамматыгар 3 элбэх квартиралаах дьиэ — уопсайа 12 квартира үһүс этапка киирбит. Такси өҥөтүгэр субсидия көрүллүбүт эрээри лицензиялаах суоппар көстүбэккэ аһаҕас хаалбыт. Кытаанах бөҕү быстах кэмҥэ мунньар пуун эмиэ аһаҕас турар. Сүөһү эстибэтин туһугар кооперацияны туруорсубуттара олоххо киирэн эрэр, программанан улахан хотон тутуллан, аны саас үлэҕэ киириэҕэ.
Хаачыстыбалаах оту оттуурга өртөөһүн боппуруоһун ыйыппыттарын, биллэрин курдук федеральнай сокуонунан көҥүллэммэтин, миэрэҕэ тардыллыахтарын сөбүн өссө төгүл быһааран биэрдилэр. Халаан кэмигэр сылгыга, сүөһүгэ куттал суоһаабатын наадатыгар бүтэйдээһин туһунан ыйытыы киирдэ. Ол эрээри нэһилиэк дьаһалтатын боломуочуйата буоларын эттилэр. Субуотунньугунан оҥоруохтарын сөбүгэр сүбэлээтилэр. Көбөкөн-Фрунзе икки ардынааҕы суолу астарыыны Көбөкөн МАУ-та ыытар эбит буоллаҕына үп тиийбэтиттэн кыһалҕаны көрсөллөрүн этэн туран, улуус өттүттэн көмөлөһөллөрүгэр туруорустулар.
Доруобуйа харыстабылын салаатыгар үс нэһилиэги хааччыйар Көбөкөннөөҕү суһал көмө массыынатын техническэй туругун тупсарарга этии киллэрдилэр. Спорт салаатыгар улуустааҕы комплекснай спартакиада балаһыанньатыгар сөп түбэспэттэрин этиннилэр.
Байыаннай дьайыыга сылдьар байыастарга, дьиэ кэргэттэригэр күүс-көмө буолалларыгар махтаннылар. Улууска олорор дьиэлэр, социальнай суолталаах объектар тутуулара, тупсарыы үлэтэ күүскэ ыытылларын бэлиэтээтилэр.
Улуус дьаһалтатын 2025 сыллаах отчуотугар 17 олохтоох сылдьан үлэни биһирииллэрин биллэрдилэр.
Семен Аргунов
