Нам улууһун дьаһалтатын 2025 сыллааҕы үлэтин отчуотугар 64 Аппааны олохтооҕо кыттыыны ылла. Мунньаҕы нэһилиэк баһылыга Иван Ноговицын салайан ыытта. Дьаһалта ааспыт сыллааҕы үлэтэ видеонан көрдөрүлүннэ. Салгыы улуус баһылыга Юрий Слепцов ааспыт сыллааҕы этиилэр туолууларын билиһиннэрдэ.
Бу күн дьон-сэргэ кыһалҕатын аһаҕастык этиннэ. Ол курдук, хаарбах дьиэттэн дьону көһөрүү программатын үһүс түһүмэҕэ хаһан саҕаланыан сөбүн, “Дьокуускай-Нам-Дьокуускай” хайысханан автобус “нулевой” рейсин таһаарбат инниттэн туох үлэ барарын, Кыһыл Дэриэбинэҕэ автобус тохтуур сирэ көтүллүбүтэ олохтоохторго кэккэ кыһалҕалары үөскэппитин, Намнааҕы поликлиникаҕа инфекционист, эндокринолог, ревматолог быраастар суохтарын, 3000 нэһилиэнньэлээх нэһилиэккэ саҥа тутуллубут амбулатория дьиэтэ кыараҕаһын, үүт, эт харчыта хаһан киирэрин, нэһилиэккэ кооператив тэрийэн нэһилиэнньэттэн ынаҕы-сүөһүнү ылан көрүүнү, эһиил Николай Семенович Гаврильев 105 сааһын үрдүк таһымҥа бэлиэтиири, Хатыҥ Арыы сынньалаҥ пааркатыгар уот кыамтата кыратынан трансформатор тутуутун, бэйдиэ сылдьар ыттары утары үлэни күүһүрдүүнү, “Дьокуускай-Нам-Дьокуускай” хайысханан сылдьар таксистар скоростной режимнэрин, сырыы сыанатын хонтуруолга ылары, “Госуслуга” мобильнай сыһыарыы нөҥүө бырааска суруйтарыыга сыыһа-халты тахсарын, арыыга от техникаларын туоратар паром төлөбүрэ олус ыараханын хонтуруолга ылары, Аппааны үрдүнэн аартык суол өрөмүөнүн, урбаанньыт Василий Бурнашев Граф Биэрэгэр туппут ФАП дьиэтин арендатын тохтоппуттара кэккэ кыһалҕалары үөскэппитин, И.Е. Винокуров аатынан Хатыҥ Арыы орто оскуолатыгар интернат пристройун тутуутун туруорустулар, ыйыттылар. Мунньах кыттыылаахтара быһаарыылаах хоруйдары тутатына ылан астыннылар.
Түмүккэ бөлөх салайааччыта Юрий Слепцов отчуокка кэлбит дьоҥҥо көхтөөх кыттыыларын иһин махтанна уонна үүммүт сылга үлэ-хамнас таһаарыылаах буоларын баҕарда, Наммыт улууһун сайдарын туһугар бары бииргэ түмсэн үлэлиэххэ диэн ыҥырда.
Мунньах кыттыылаахтара улуус баһылыга Юрий Иннокентьевич Слепцов, улуус дьаһалтата дьон-сэргэ туһугар таһаарыылаах үлэлэрин-хамнастарын бэлиэтээтилэр уонна сыллааҕы үлэни биһирииллэрин биир санаанан биллэрдилэр.
«Нам улууһа» МО пресс-сулууспата
