Улуус баһылыгын солбуйааччы Филипп Николаев салайааччылаах отчуоттуур бөлөх мунньаҕар, Партизан нэһилиэгэр, 42 олохтоох кыттыыны ылла. Видеотчуоту көрөн баран, былырыыҥҥы киирбит боппуруостар туолууларын тула кэпсэтии барда. Ол кэннэ ыйытыктарга, этиилэргэ киирдилэр. Мунньаҕы Партизан нэһилиэгин баһылыга Алексей Зырянов салайан ыытта.
Олохтоохтор нэһилиэккэ исписэлиистэр олорор дьиэлэрин, саҥа детсад тутуутун, Д.И.Кривошапкин аатынан “Хомус” сынньалаҥ киинин капитальнай өрөмүөнүн туруорустулар.
Халаан уутун кэнниттэн өрөмүөннэнэн быйыл үлэҕэ киирбит балыыһалара тымныытын, айан трассатыттан туораан нэһилиэккэ киирии суолларга уот, бэлиэ суоҕа кутталы уонна моһуоктары үөскэтэрин эттилэр.
Тыа хаһаайыстыбатын боломуочуйата быйылгыттан улууска бэриллибитин туох диэн сыаналыыгыт, быйыл үүт уонна сүөһү төбөтүгэр харчы тоҕо хойутаата диэн ыйыттылар.
Олохтоох балыыһаҕа көрдөрүнэллэригэр бастайааннай үлэһиттэр суохтарынан эрэйи көрсөллөрүн эттилэр.
Нэһилиэккэ бэйдиэ сылдьар ыт боппуруоһа сытыытык турарын иһитиннэрдилэр. Нэһилиэк дьаһалтата сөбүлэҥ быһыытынан субсидия харчы төлүүрүн үрдүнэн Василий Крымков тэрилтэтэ сайаапка түспүтүн үрдүнэн кэлэн ыттары ылбат диэтилэр.
Аҕам саастаах дьоҥҥо “Забота – Арчы” уонна “Эҥсиэли” хаһыаттары суруттарыыга көмө харчы, нэһилиэк тэрилтэлэрин уонна чааһынай ыаллар дьиэлэрин көрөргө электрик штата көрүллүөхтэрэ дуо диэн ыйыттылар?
Бу тымныы күннэргэ детсад сөрүүкээбитин, сорох өттүгэр +18 ° кыраадыс көрдөрөн турар эттилэр. Олохтоохтор сорох ыйытыыларыгар Филипп Васильевич уонна тустаах исписэлиистэр тута хоруйдаатылар, этиилэри бэлиэтэннилэр.
Нэһилиэнньэттэн киирбит ыйытыктар, этиилэр боротокуолга киирдилэр. Улуус дьаһалтатын 2025 сыллааҕы үлэтин бары «биһириибит» диэн сыана быстылар.
Мунньахха улуус депутаттарын Сэбиэтин бэрэссэдээтэлэ Алексей Винокуров кыттыыны ылла.
Улуус баһылыгын солбуйааччы Филипп Николаев нэһилиэк олохтоохторун кэлэн иһэр саргылаах саҥа дьылынан эҕэрдэлээн туран бары үтүөнү баҕарда. Мунньахха кэлэн көхтөөх кыттыыны ылбыттарыгар махталын биллэрдэ.
«Нам улууһа» МО пресс-сулууспата
