Тохсунньу 22 күнүгэр   Нам улууһун баһылыгын бастакы солбуйааччыта Анатолий Павлов салайааччылаах бөлөх улуус дьаһалтатын  2025 сыллааҕы үлэтин отчуотун  Көбөкөн нэһилиэгэр оҥордо. Мунньаҕы нэһилиэк баһылыга Гаврил Гоголев  салайан ыытта. Уопсайа  32 киһи кыттыыны ылла.

Бу күн маннык ыйытыылар, этиилэр киирдилэр:

• 1. Көбөкөн сайдыытыгар комплекснай программа ылыллыыта;
• 2. Оскуола тутуута хаһан саҕаланыаҕай?
• 3. Оскуолаҕа оптимизация  хайдах барыаҕай?
• 4. Үөрэх управлениетыгар наҕараадаҕа түһэрэргэ төһө квота көрүллэрэ, учууталларбытын наҕараадаҕа түһэрэбит да,  докумуон тиийбэтэх буолар;
• 5. Тыа хаһаайыстыбатын сайдыытыгар хайдах хайысханы тобулан үлэлиибитий?
• 6. Оскуолаҕа тоҕо ГСМ көрүллүбэтий?
• 7. Илин эҥэрдэргэ стоматологтар 4 күн кэлэн үлэлииллэрэ былааннанар да, 2  күн айаннарыгар барар. Икки күн эрэ көрөллөр, ультракоин илдьэ кэлэллэрэ буоллар;
• 8. Балыыһаҕа 3 эрэ койка баар,  оҕо койката суоҕа ыарахаттары үөскэтэр;
• 9. Эдэр үлэһиттэр кэлэн үлэлиэ этилэр да, дьиэ суоҕа атахтыыр;
• 10. Үтүө дьыаланан тутулла турар 6 квартиралаах дьиэбит оҥоһуута тоҕо тохтоото?
• 11. “Фрунзе-Маймаҕа”  суол олус мөлтөх туруктаах;
• 12. Соцконтракка кыттарга туох усулуобуйа баарый?  Мэҥэ-Хаҥаласка соцконтрагынан хотон туттуохха сөп дииллэр,  биһиэхэ тоҕо суоҕуй?
• 13. Үс нэһилиэги холбоон Көбөкөн нэһилиэгэр киинэ көрдөрөр экран ылыахха сөп дуо?
• 14. Өртөөһүн ыытыллыбакка, ходуһабыт мөлтөөтө;
• 15. Историяны токуратыы үлэтэ тоҕо бара турар? Көбөкөн нэһилиэгэ урут уруккаттан баар, биир Көбөкөн нэһилиэгэ этэ, урут Фрунзе суоҕа, ону тоҕо Фрунзе уонна Көбөкөн диэн араара-араара кинигэҕэ киллэрэллэрий?
• 16. Бэлиэ  сирдэр реестрдэригэр киллэриигэ  туох үлэ барарый?
• 17. Босхо сылдьар ыттар хаһаайыттарын ыстарааптааһын   механизмын судургутутуохха;
• 18. Көбөкөн нэһилиэгэр музей арыллыытын өйүүргүт уонна Иркутскай архивыгар краеведтары докумуон көрдөтө, үөрэттэрэ ыытаргыт буоллар;
• 19. Убойнай сыаҕы  үлэлэтии.

Аһаҕас куоластааһын түмүгэр  30 киһи отчуоту биһириирин биллэрдэ, 2 киһи туттунна. Олохтоохтор улуус дьаһалтатын үлэтигэр өссө үрдүк ситиһиилэри баҕардылар, этиилэрэ, туруорсар боппуруостара туолалларыгар эрэллээхтэрин биллэрдилэр.

Отчуоттуур бөлөх салайааччыта Анатолий Павлов мунньахха кэлбит дьоҥҥо көхтөөх кыттыыларын иһин махтанна, кэлэр сылга ситиһиилээх үлэни баҕарда.  

“Нам улууһа” МО пресс- сулууспата