Ахсынньы 22 күнүгэр, уһулуччулаах государственнай уонна политическай деятель Максим Аммосов төрөөбүт күнүгэр, Нам улууһун баһылыга Юрий Слепцов салайааччылаах бөлөх Хатырык нэһилиэгэр отчуоттаата. Уопсайа 60 киһи кыттыыны ылла.
Мунньаҕы нэһилиэк баһылыга Артур Ноговицын салайан ыытта. Мустубут дьон видеонан отчуоту сэргээн көрдүлэр-иһиттилэр. Видеотчуот кэнниттэн Юрий Слепцов былырыын киирбит этиилэр туолууларын иһитиннэрдэ.
Аһаҕас кэпсэтиигэ дьон көхтөөхтүк кытынна. Ол курдук, эһиилги улуус бюджетын, ветеринар наадатын, сылгы иитэр кооператив үлэтин сайыннарыыны, КСМФЦ дьиэтин туппут бэдэрээтчит үлэтин итэҕэһин-быһаҕаһын 5 сыл иһигэр туоратыахтааҕын, “Земский ветеринар” программа баар буоларын, СВО-ҕа сураҕа суох сүппүт дьону көрдөөһүҥҥэ туох үлэ барарын ыйыталастылар. Ону сэргэ Максим Аммосов төрөөбүт арыытыгар киириигэ муоста тутуутун, Пушкинскай карта оҕолорго уонна ыччакка туһанылларын, “Кэнчээри” оҕо саадыгар насоснай станция, баһаарынай гидрант боппуруостарын, оскуола үлэһиттэрин штатнай расписаниетын сааһылааһыны, улуустааҕы комплекснай спартакиада балаһыанньатыгар уларытыылары киллэриини, врачебнай амбулатория ититиитин ситимин хапытаалынай өрөмүөнүн туруорустулар. Маны сэргэ нэһилиэккэ эдэр ыаллар кэлэн олохсуйуулара элбээбитинэн, Лена Максимовна Аммосова аатынан кыбаарталга гаас ситимин тардыыны түргэтэтэри этии быһыытынан киллэрдилэр.
Түмүккэ улуус баһылыга Юрий Слепцов Ощепкова Варвара Илларионовнаҕа – улуус баһылыгын бочуотунай грамотатын, Соловьева Мария Степановнаҕа – улуустааҕы дьахтар сэбиэтин бочуотунай грамотатын үөрүүлээх быһыыга-майгыга туттарда, мунньах кыттыылаахтарыгар көхтөөх кыттыыларын иһин махталын тиэртэ.
Нэһилиэк баһылыга Артур Ноговицын улуус баһылыгар Юрий Слепцовка, улуус дьаһалтатын специалистарыгар Альбина Сысолятинаҕа, Владислав Васильевка махтал суруктары туттарда.
Бу күн дьон-сэргэ мунаарбыт ыйытыыларыгар тустаах салайааччылартан толору хоруйдары ыллылар. Мунньах кыттыылаахтара үгүс үлэ барбытын иһин улуус баһылыгар Юрий Слепцовка махталларын тиэртилэр уонна сыллааҕы үлэни биһирииллэрин биир санаанан биллэрдилэр.
“Нам улууһа” МО пресс-сулууспата
