Эһигини идэлээх бырааһынньыккытынан – Россия Бэчээтин күнүнэн истиҥник эҕэрдэлиибин! Бүгүҥҥү күҥҥэ Нам улууһугар  «Эҥсиэли» хаһыаты сэргэ  “Саха” НКИХ Намнааҕы филиала, куйаар  ситиминэн сонуну киэҥник тарҕатар сириэстибэлэр айымньылаахтык үлэлииллэр.

Үлэ үтүө түмүктэрин, биир дойдулаахтарбыт ситиһиилэрин, ыытыллар тэрээһиннэри улууспут дьоно-сэргэтэ күн ахсын хаһыат, телевидение, радио, куйаар ситимин нөҥүө көрөллөрө-истэллэрэ  – бу барыта суруналыыстар сыралаах үлэлэрин түмүгэ буолар.

Бэчээт уонна сонуну киэҥник тарҕатар сириэстибэлэр дьону-сэргэни сомоҕолуур күүс буолаллар, бары ыарахаттары туоруурбутугар эрэли үөскэтэллэр. Эһиэхэ улууспут сайдыытыгар, гражданскай уопсастыба бөҕөргүүрүгэр  быһаччы кыттыыгыт иһин махталбытын тиэрдэбин! Саҕалаабыккыт үтүө түмүктээх буоллун, айымньылаах үлэҕит сайда,  кэрэхсэнэ турдун!