Саҥа сылга үлэ бастакы күнүгэр, «Нам улууһа» МО баһылыгын планерка мунньаҕар улуус баһылыгын солбуйааччылара, улуус тэрилтэлэрин уонна дьаһалта отделларын, управлениеларын салайааччылара, нэһилиэк баһылыктара кыттыыны ыллылар.
- Юрий Иннокентьевич мунньах саҕаланыан иннинэ тохсунньу 13 күнүгэр, дойду үрдүнэн бэчээт эйгэтин, сонуну киэҥник тарҕатар үлэһиттэр, суруналыыстар идэтийбит бырааһынньыктара бэлиэтэнэринэн, улуустааҕы «Эҥсиэли» хаһыат редакциятын коллективын эҕэрдэлээтэ уонна «Нам улууһа» МО баһылыгын Бочуотунай грамотатын редакция салайааччытыгар Лена Ноговицынаҕа туттарда;,
- 2026 сыл Нам улууһугар киэн туттар биир дойдулаахпыт, Саха сирин уһулуччулаах государственнай уонна политическай деятеля Илья Егорович Винокуров төрөөбүтэ130 сылын бэлиэтиир уонна дьиэ кэргэн экономикатын сайыннарыы, бөҕөргөтүү сылынан биллэриллибитинэн киэҥ былааннаах үлэлэр дьоһун түмүктээх буолалларын туһугар бары биир санаанан таһаарыылаах үлэлииргэ ыҥырда;
- Оскуола оҕолоро эбии үөрэхтээһининэн хабыллыыларын, дьоҕурдарын, талааннарын сайыннаралларыгар, бириэмэлэрин туһалаахтык атааралларыгар болҕомтону, үлэни күүһүрдэргэ сорук туруорда;
- СӨ Бырабыытылыстыбатын 2025 сыллааҕы үлэтин отчуота олунньу ый иккис аҥарыгар нэһилиэктэринэн ыытыллара былааннанар;
- Ааспыт сыл олунньу ыйыттан улуус дьаһалтатын экономика управлениетын иһинэн үлэлиир проектнай хамаанда Ресурснай киин буолан үлэтин хаҥатыаҕа. Киин үлэһиттэрэ улууспут түмсүүлэрин уонна биирдиилээн дьон көҕүлүүр бырайыактарын, о.э. гражданскай инициативаны өйүүр сыаллаах киирбит бырайыактары түмэн, сыаналаан, туһуламмыт сиригэр ыытарга үлэлэһиэхтэрэ.Ону таһынан өрөспүүбүлүкэҕэ биллэриллэр граннаах куонкурустарга дьону кытта ыкса сибээстээхтик үлэлэһиэхтэрэ;
- Бэйдиэ сылдьар ыыттары бэрээдэктээһиҥҥэ нэһилиэк дьаһалталара болҕомтону күүһүрдэллэригэр сорук турар;
- Сири көдьүүстээхтик туһаныы, тупсарыы уонна сир арендатын төлөбүрүттэн улуус бюджетыгар харчы толору киириитин боппуруостарыгар үлэ салгыы ыытыллыаҕа;
- Дойду Президенэ Владимир Путин «Дьокуускай куорат төрүттэммитэ 400 сылын бэлиэтээһин туһунан» Ыйаахха 2025 сыл муус устар ыйыгар илии баттаабыта. Дьокуускай куорат төрүттэниитэ Нам улууһун кытта ыкса ситимнээх. Онон бу дьоһуннаах докумуон Эҥсиэли хочотун олохтоохторугар ураты уонна бэлиэ суолталаах. Архыып докумуоннарыгар олоҕуран, Саха сиригэр государственность Нам сириттэн саҕаламмытын туһунан Бүтүн Россиятааҕы конференция олунньу ыйыгар ыытыллара былааннанар.
- Нэһилиэк баһылыктара тэрилтэ салайааччыларыгар тустаах ыйытыктары биэрэн тута эппиэттэри ыллылар.
“Нам улууһа” МО пресс – сулууспата
